وزارت خزانہ نے رواں مالی سال کے دوران ترقیاتی منصوبوں کے لیے فنڈز کے اجراء کو مالیاتی گنجائش سے مشروط کرتے ہوئے پبلک سیکٹر ڈویلپمنٹ پروگرام (پی ایس ڈی پی) کے تحت فنڈز کی مرحلہ وار فراہمی کی حکمت عملی جاری کردی ہے۔
وزارت خزانہ کی جانب سے جاری نوٹیفکیشن کے مطابق ترقیاتی فنڈز چار سہ ماہی اقساط میں جاری کیے جائیں گے۔ پہلی سہ ماہی میں مجموعی فنڈز کا 15 فیصد، دوسری سہ ماہی میں 20 فیصد، تیسری سہ ماہی میں 25 فیصد جبکہ چوتھی سہ ماہی میں 40 فیصد فنڈز فراہم کیے جائیں گے۔
نوٹیفکیشن کے مطابق نئے مالی سال میں ترقیاتی منصوبوں کے لیے ایک ہزار ارب روپے مختص کیے گئے ہیں، جبکہ منصوبہ بندی ڈویژن منظور شدہ منصوبوں کے لیے فنڈز جاری کرنے کا مجاز ہوگا۔ فنڈز کی تقسیم صرف منظور شدہ بجٹ کی حد کے اندر کی جائے گی۔
وزارت خزانہ نے ہدایت کی ہے کہ غیر ملکی ادائیگیوں کے لیے پیشگی منظوری حاصل کرنا لازمی ہوگا، جبکہ مقررہ حد سے زائد ادائیگی وزارت خزانہ کی اجازت کے بغیر نہیں کی جاسکے گی۔
نوٹیفکیشن میں مزید کہا گیا ہے کہ شفاف مالی نظم و نسق کو یقینی بنانے کے لیے ہر ترقیاتی منصوبے کے لیے علیحدہ اسائنمنٹ اکاؤنٹ کھولا جائے گا۔