کراچی (نیٹ نیوز) ثانوی تعلیمی
بورڈ کے چیئرمین پروفیسر انوار احمد زئی نے جمعہ کے دن مختلف امتحانی مراکز
کا دورہ کرنے کے بعد بتایا کہ بورڈکے تحت ہونے والے سیکنڈری اسکول سرٹیفکیٹ
پارٹ ٹو میٹرک کے ضمنی امتحانات برائے سال 2015کیلئے 155امتحانی مراکز میں
ہونے والی نقل کی روک تھام کیلئے کئے گئے سخت اقدامات اور تلاشی کے بعد
امتحانی مرکز میں جانے کی حکمت عملی کے نتیجے میں نقل کے کیسز میں نمایاں
کمی آئی ہے تاہم جمعہ کے دن اخلاقیات کے امتحانی پرچے کے دوران رول نمبر
942366کے تحت گورنمنٹ گرلز سیکنڈری اسکول بلدیہ ٹاؤن کے سینٹر میں اصل
امیدوار کی جگہ دوسری لڑکی امتحان دیتے ہوئے پکڑی گئی، جس کے باعث فوری طور
پر نقلی امیدوار کو امتحان دینے سے روک دیا گیا اور اس کی رپورٹ سزا دینے
والی متعلقہ کمیٹی کو کر دی گئی ہے اور اصل امیدوار کیخلاف کیس بنا دیا گیا
ہے۔
پروفیسر انوار احمد زئی نے کہا کہ ویجلینس ٹیموں سے روزانہ کی بنیاد پر
رپورٹ حاصل کی جا رہی ہے جبکہ امیدواروں سے ایک بار پھر کہا گیا ہے کہ وہ
اپنے سینٹر کے علاوہ کسی اور مرکز میں امتحان نہیں دے سکیں گے جس کیلئے
سینٹر سپرنٹنڈنٹس کو واضح ہدایات دے دی گئی ہیں اور وہ ایسے کسی امیدوار کو
اپنے مرکز میں شرکت سے روک رہے ہیں اس لئے کوئی امیدوار مہم جوئی کیلئے
اپنا وقت ضائع نہ کرے اور ہر صورت میں اپنے ہی امتحانی مرکز میں امتحان دے۔