آپ نے اکثر دیکھا ہو گا کہ شادی کے بعد ناصرف خواتین بلکہ مرد حضرات کا بھی وزن بڑھنے لگتا ہے اور وہ موٹے ہو جاتے ہیں لیکن کیا آپ جانتے ہیں کہ ایسا کیوں ہوتا ہے؟
کامیاب شادی اور جسمانی وزن میں اضافہ کا براہِ راست تعلق ہے۔ یہ دعویٰ آسٹریلیا کی سینٹرل کوئنزلینڈ یونیورسٹی کی ایک تحقیق میں سامنے آیا۔
تحقیق کے دوران 15 ہزار سے زائد جوڑوں کا جائزہ لیا گیا جن کے رشتے کو 10 سال ہوچکے تھے جس کے اختتام میں یہ دریافت کیا گیا کہ شادی شدہ جوڑوں میں جسمانی وزن بڑھنے کا امکان تنہا افراد کے مقابلے میں زیادہ ہوتا ہے۔ محققین نے اس کی ایک دلچسپ وجہ بتائی کہ شادی کے بعد لوگوں کو اپنے شریک حیات کو مزید متاثر کرنے کی ضرورت محسوس نہیں ہوتی، لہذا ان کا جسم پھیلنا شروع ہوجاتا ہے۔
اسی طرح جن جوڑوں کے بچے ہوتے ہیں، ان کے اندر اپنے بچوں کے بچے ہوئے کھانے کا رجحان بھی پایا جاتا ہے۔ نتائج سے معلوم ہوا کہ جوڑوں میں جسمانی وزن بڑھنے کی وجہ ہر قسم کی غذا کو بے فکری سے کھانا ہوتا ہے کیونکہ انہیں اپنے جسمانی ساخت جوانی کی طرح رکھنے میں کوئی خاص دلچسپی نہیں ہوتی۔
واضح رہے کہ یہ پہلی تحقیق ہے جس میں بتایا گیا کہ شادی کے بعد جسمانی وزن میں اضافے کی وجہ صرف غیر صحت مند طرز زندگی نہیں ہوتا۔