اگر کبھی آپ نے طیارے کا سفر کیا ہے تو یہ ضرور محسوس کیا ہو گا کہ ٹیک آف یا لینڈنگ کے وقت کانوں میں تکلیف سی محسوس ہوتی ہے، بعض اوقات کان بند ہو جاتے ہیں جبکہ اکثر سیٹیاں سی بجتی ہوئی محسوس ہوتی ہیں۔
لیکن کیا آپ جانتے ہیں کہ ایسا کیوں ہوتا ہے؟ کیا یہ کسی خطرناک بیماری کی علامت ہے؟
دراصل ایسا ہونا معمولی بات ہے۔ ہوتا کچھ یوں ہے کہ طیارے میں ہوا کے دباﺅ میں توازن نہیں ہوتا۔ جب ہم زمین پر ہوتے ہیں تو ہمارے ارگرد یعنی کانوں کے پردوں کے اطراف ہوا کا دباﺅ برابر یا ایک جیسا ہوتا ہے، جس سے ہوا آسانی سے کان اور حلق کی درمیانی شریان سے گزر جاتی ہے۔
لیکن جب ہم طیارے میں سفر کرتے ہیں تو وہاں ہوا کا دباﺅ ٹیک آف اور لینڈنگ کے وقت غیر متوازن ہو جاتا ہے اور اس تبدیلی کو ہمارے کانوں کے پردے محسوس کرلیتے ہیں۔
اہم بات یہ ہے کہ لینڈنگ اور ٹیک آف کے دوران سونے سے گریز کریں، نزلہ زکام کی صورت میں ممکن ہو تو فضائی سفر سے گریز کریں۔
ویسے یہ کوئی سنگین مسئلہ نہیں ہے البتہ بے چینی اور سننے میں مشکل کا سامنا چند دن سے زیادہ ہونے پر ڈاکٹر سے رجوع کریں۔