ہم دانت برش محض منہ کی صفائی کے لئے کرتے ہیں لیکن آج ہم آپ کو ایک ایسی بات بتانے جا رہے ہیں جس کو جاننے کے بعد آپ دانت صاف کرنے میں کبھی لاپرواہی نہیں برتیں گے۔
ڈیلی میل کی ایک رپورٹ کے مطابق جنوبی کوریا کے تحقیقی اور طبی ماہرین نے دانت صاف کرنے کے حوالے سے تجربہ کیا، تحقیق کے دوران ایک لاکھ 90 ہزار لوگوں کے دانت برش کرنے کے عمل اور اُن کے منہ کی صفائی کے حوالے سے دس سال کا ڈیٹا جمع کیا گیا جس کا ماہرین نے موازنہ کیا اور پھر رپورٹ تیار کی۔
تحقیقی کے مطابق جو لوگ دن میں تین بار برش کرتے ہیں اُن کو ذیابیطس (شوگر) کا مرض لاحق ہونے کے خطرات 14 فیصد کم ہوجاتے ہیں۔
ماہرین کے مطابق 10 سال تک مسلسل برش نہ کرنے والے 16 فیصد افراد کو ذیابیطس کا مرض لاحق ہوا اور تقریباً اتنے ہی لوگوں کو مسوڑھوں کی بیماریوں کا سامنا بھی تھا۔
تحقیقاتی ٹیم کے سربراہ ڈاکٹر تائی جن سانگ کے مطابق دانت برش کرنے کا یہ فائدہ 51 سال سے کم عمر لوگوں میں سامنے آیا، اس سے زائد عمر کے لوگوں میں دانت برش کرنے کا کوئی فرق سامنے نہیں آیا اور ان کو ذیابیطس لاحق ہونے کا خطرہ ایک جیسا ہی رہا۔