مہلک وبا کورونا وائرس کے حوالے سے کہا جاتا ہے کہ یہ ادھیڑ عمر والے افراد کے ساتھ ساتھ ان لوگوں کے لئے بھی خطرناک ثابت ہوتا ہے جن کا مدافعتی نظام کمزور ہو۔
سائنسدانوں نے اس سے متعلق انکشاف کیا ہے کہ دنیا بھر میں کروڑوں بلکہ اربوں افراد اپنے کھانوں میں روزانہ کی بنیاد پر ایک ایسی غلطی کرتے ہیں جو بلڈ پریشر کے ساتھ مدافعتی نظام کو بھی کمزور کر دیتی ہے۔
یہ بات جرمنی میں ہونے والی ایک طبی تحقیق میں سامنے آئی۔
بون یونیورسٹی ہاسپٹل کی تحقیق کے مطابق دریافت کیا گیا کہ چوہوں کو زیادہ مقدار میں نمک والی غذا کا استعمال کرائے جانے پر وہ زیادہ سے زیادہ بیکٹریل انفیکشن کا شکار ہونے لگے۔
اسی طرح محققین نے اپنی تحقیق میں دیکھا کہ جو افراد اپنی غذا میں روزانہ 6 گرام اضافی نمک کھاتے ہیں، ان میں بھی مدافعتی کمزوریاں ظاہر ہونے لگ جاتی ہیں۔
ماہرین کا کہنا تھا کہ پہلی بار ہم نے اپنی تحقیق میں کامیابی حاصل کی کہ زیادہ نمک کھانے کی عادت مدافعتی نظام کو کافی حد تک کمزور کر سکتی ہیں۔