چین میں مہلک کورونا وائرس کی ویکسین کے انسانی تجربے کے بعد 14 افراد صحتیاب ہو گئے۔
غیر ملکی نیوز ایجنسی کی رپورٹ کے مطابق چین کے شہر ووہان میں کورونا ویکسین کو لوگوں پر آزمایا گیا۔ اس تجربے کے لئے 108 افراد نے رضاکارانہ طور پر اپنے آپ کو پیش کیا، ٹیسٹ کے پہلے مرحلے میں 18 شہریوں پر تجربہ کیا گیا۔
ٹیسٹ کے بعد 14 افراد نے اپنی صحت برقرار رکھی اور وہ مکمل طور پر صحتیاب ہوگئے، اسی بنیاد پر ماہرین نے انہیں گھر بھیج دیا البتہ 6 ماہ تک ان کا جائزہ لیا جاتا رہے گا۔ کورونا ویکسین کی آزمائش کے بعد رضاکاروں کے 18 افراد پر مشتمل گروہ کو چودہ روز کے لئے آئسولیشن میں رکھا گیا۔
سائنس دانوں کی جانب سے کہا گیا کہ ابھی ویکسین کے تجربے کو پرکھا جارہا ہے، اگر یہ کامیاب ہوتا ہے تو یہ تجربہ مختلف ممالک کے شہریوں پر بھی آزمایا جائے گا۔ چین کے اعلیٰ ملیٹری ادارے کے شعبہ طب نے ویکسین کی تیاری کے بعد اسے انسانوں پر ٹرائل کے لئے 17 مارچ کو پیش کیا۔ 18 سے 60 سال کے عمر کے افراد نے اس تجربے میں حصہ لیا ہے۔
14 افراد کے علاوہ تمام افراد تاحال قرنطینہ میں ہیں۔ گھر پہنچنے والے ایک رضاکار کا کہنا تھا کہ ٹیسٹ کے دوران انہیں درد اور تکلیف کا بالکل احساس نہیں ہوا۔