وٹامن ڈی ممکنہ طور پر کورونا وائرس سے ہونے والی مہلک بیماری کووڈ 19 کی شدت کے تعین میں اہم کردار ادا کرسکتا ہے۔
یہ دعویٰ آئرلینڈ میں ہونے والی ایک طبی تحقیق کے نتیجے میں سامنے آیا۔
ٹرینیٹی کالج کی تحقیق کے مطابق وٹامن ڈی نظام تنفس کے انفیکشنز کی روک تھام، اینٹی بائیوٹک کی ضرورت کو کم جبکہ امراض کے خلاف مدافعتی نظام کے ردعمل کو بہتر بناتا ہے۔
اس تحقیق میں دنیا کے مختلف حصوں میں کورونا وائرس سے اموات اور وٹامن ڈی کے تعلق کو دیکھا گیا۔
محققین کے مطابق چند ممالک جیسے آسٹریلیا میں کورونا سے اموات کی شرح کم ہے جبکہ وہ ممالک جہاں کے شہریوں میں وٹامن ڈی کی کمی پائی جاتی ہے، وہاں کووڈ 19 کے مریضوں میں سنگین ورم کے مسائل سامنے آئیں ہیں۔
ماہرین کا کہنا تھا کہ وٹامن ڈی کی کمی سورج کی روشنی میں کم گھومنے، عمر میں اضافے، ہائی بلڈ پریشر، شوگر اور موٹاپے جیسے عناصر کا نتیجہ ہوتی ہے اور اس میں کووڈ 19 کا خطرہ زیادہ بڑھ جاتا ہے۔
اگر آپ کو اس حوالے سے علم نہیں ہے تو جان لیں کہ وٹامن ڈی سورج کے ذریعے بھی حاصل کیا جاسکتا ہے اور اس میں روزانہ 10 سے 15 منٹ تک دھوپ میں رہنے کی ضرورت ہوتی ہے۔