کراچی: ثانوی تعلیمی بورڈ کراچی نے نہم جماعت 2021 کیلئے آن لائن امتحانی اور انرولمنٹ فارم جمع کرانے کا شیڈول جاری کر دیا ہے جبکہ گورنمنٹ اسکول بغیر کسی فیس کے نہم جماعت کے امتحانی اور انرولمنٹ فارم 15دسمبر تک بغیر کسی فیس کے جمع کرا سکتے ہیں۔ بورڈ کے سیکرٹری سید محمد علی شائق نے کہا ہے کہ بورڈ سے الحاق شدہ اسکول سربراہان نہم جماعت کیلئے آن لائن امتحانی فارم 15دسمبر تک بغیر لیٹ فیس کے جبکہ آن لائن انرولمنٹ فارم 30نومبر2020 تک بغیر لیٹ فیس کے بورڈ کی سائٹ www.bsek.edu.pk/bsekportalپر جمع کرا سکتے ہیں۔ سیکرٹری بورڈ نے کہا کہ تمام گورنمنٹ اسکول،بلدیہ،میونسپل کارپوریشن اور لیبرڈپارٹمنٹ کے ماتحت آنے والے اسکول بغیر کسی فیس کے امتحانی فارم اپنے تصدیق شدہ گورنمنٹ اسکول کے اتھارٹی لیٹر اور تمام طلبہ کے جمع کئے گئے انرولمنٹ کی رسید کی فوٹو کاپی کے ساتھ امتحانی فارم اکاؤنٹس سیکشن سے رسید بنوانے کے بعدبورڈ کے ایگزامینشن اسٹور سے حاصل کر سکتے ہیں اور اسی شیڈول کے مطابق جمع بھی کرا سکتے ہیں۔