محکمہ موسمیات کی جانب سے شہریوں کے لیے یہ خبر سامنے آئی ہے کہ پیر سے بدھ کے درمیان شہر میں موسم سرما کی پہلی بارش ہونے کا امکان ہے۔
تفصیلات کے مطابق ترجمان محکمہ موسمیات خالد ملک کا کہنا ہے کہ 23 سے 25 نومبر کے درمیان شہر قائد میں بارش کا امکان کافی زیادہ ہے، مضافاتی علاقوں میں ہلکی جبکہ شہر کے دیگر علاقوں میں بوندا باندی اور پھوار پڑنے کی توقع ہے تاہم گرج چمک کے ساتھ بارش ہونے کا کوئی امکان نہیں۔
ترجمان کے مطابق بارش کا سبب ملک میں داخل ہونے والا دوسرا ویسٹربنس سسٹم ہے، بارش کے بعد شہر بھر میں تیز اور سرد ہوائیں چلنے کی توقع ہے جس کی وجہ سے درجہ حرارت گرسکتا ہے اور سردی بڑھ سکتی ہے۔
محکمہ موسمیات کے مطابق ہفتے کے روز مطلع دن میں صاف اور رات میں خنک رہنے کا امکان ہے، کم سے کم پارہ 14 سے 16 ڈگری کے درمیان رہنے کی توقع ہے۔