پاکستان پیپلز پارٹی کی سینئر رہنما شیری رحمان نے گلگت بلتستان میں احتجاج کے دوران سیل ہونے والے پی پی کے دفاتر سے متعلق سوال کیا ہے کہ پیپلز پارٹی کے آفس کن بنیاد پر بند کیے جا رہے ہیں؟
شیری رحمان نے گلگت بلتستان میں پیپلز پارٹی کے احتجاج کے دوران کارکنان کی گرفتاری پر بھرپور مذمت کرتے ہوئے کہا ہے کہ ہمارہ الیکشن چوری ہوا ہے، لوگوں کا ووٹ چوری ہوا، گلگت بلتستان کے انتخابات میں دھاندلی کے خلاف پُر امن احتجاج ہمارہ آئینی حق ہے۔
شیری رحمان کا کہنا تھا کہ الیکشن کے بعد گلگت بلتستان میدان جنگ بنا ہوا ہے، تحریک انصاف دھاندلی چھپانے کے لیے گلگت بلتستان میں انتشار پھیلا رہی ہے۔
انہوں نے مزید کہا کہ پیپلزپارٹی کے کارکن پر امن ہیں، ہنگامے تحریک انصاف کے کارکنان کر رہے ہیں، حکومت شر پسندی میں ملوث افراد کو گرفتار کرے، ہمارے کارکنان کو نہیں۔