خوبصورت آواز کے مالک اداکار آغا علی نے حال ہی میں اپنی جیکٹ کے حوالے سے ایسا انکشاف کیا کہ مداح حیران رہ گئے، کیونکہ زیادہ تر لوگ ایسی باتیں کم ہی بتاتے ہیں۔
آغا نے سماجی رابطے کی مقبول ترین ایپلیکیشن انسٹاگرام پر جیکٹ میں ملبوس ایک تصویر شئیر کی جس کے کیپشن میں ساری کہانی بتا دی۔
اداکار نے لکھا کہ ''میں نے اپنی پہلی لیدر کی جیکٹ 2001 میں خریدی اور پھر 12 سال تک اُسے ہی استعمال کیا''۔
آغا علی نے انکشاف کیا کہ ''جب جیکٹ کا لیدر خراب ہوا تو پھر میں نے اُسے پہننا چھوڑ دیا مگر جیکٹ ابھی تک میرے پاس ہے۔ مجھے چمڑے (لیدر) کی جیکٹس بے انتہا پسند ہیں، یہ وہ واحد چیز ہے جو میں نے کسی سے مانگ کر نہیں پہنی''۔
اداکار نے یہ بھی بتایا کہ ''اب جب میری پرانی جیکٹ خراب ہوگئی تھی تو میں نے حال ہی میں نئی چمڑے کی جیکٹ بنوائی ہے''۔
آغا علی کا اس حوالے سے مزید کہنا تھا کہ ''کراچی میں چلنے والی ٹھنڈی ہواؤں کی بدولت چمڑے کی جیکٹ پہننا ممکن ہوا ورنہ شہر میں جیکٹ پہننے کی ضرورت پیش نہیں آتی تھی''۔
خیال رہے شہر قائد میں گزشتہ 3 دنوں سے سردی کی شدت میں اضافہ ہوا ہے، جس نے شہریوں کا خون جما دیا۔ شدید سردی کے باعث لوگوں نے گرم کپڑے نکالے اور انہیں زیب تن کیا۔