گزشتہ روز حکومت کی جانب سے ایک نوٹیفیکیشن جاری کیا گیا جس کے مطابق کراچی کی مشہور ترین فوڈ اسٹریٹ کو صرف پیدل چلنے والوں کے لیے مختص کر دیا گیا۔
ذرائع کے مطابق شہر قائد کے علاقے برنس روڈ فوڈ اسٹریٹ پر گاڑیوں کا داخلہ بند کر دیا گیا جبکہ وہاں لوگ صرف پیدل چل سکیں گے۔
برنس روڈ فوڈ اسٹریٹ کو 10 جنوری سے پیدل چلنے کے لیے مختص کردیا جائے گا، جس کا نوٹیفکیشن ڈپٹی کمشنر جنوبی کی جانب سے جاری کردیا گیا ہے۔
شاہراہ لیاقت کو فریسکو سے کورٹ روڈ تک شام 7 بجے کے بعد بلاک کردیا جائے گا، آرام باغ سے فریسکو آنے والی ٹریفک کو ایم اے جناح روڈ موڑ دیا جائے گا۔
نوٹیفیکیشن کے مطابق آرام باغ سے فریسکو آنے والی ٹریفک کو پیپلز اسکوائر موڑ دیا جائے گا، فریسکو سے فاطمہ جناح وومن کالج تک پیدل چلنے کے لیے مختص کیا جائے گا۔
ڈپٹی کمشنر جنوبی نے کہا ہے کہ رہائشیوں کے لیے اسٹیکرز جاری کیے جائیں گے تاکہ وہ اپنی گاڑی پارک کرسکیں جبکہ فوڈ اسٹریٹ آنے والوں کو ویلے پارکنگ کی سہولت مہیا کی جائے گی۔
تاہم ایمرجنسی صورت حال سے نمٹنے کے لیے راستہ رکھا جائے گا، سڑک کے دوران اطراف مارکنگ کی جائے گی تاکہ ہوٹلز کرسیاں آگے نہ رکھ سکیں، تمام تر انتظامات شام 7 بجے کے بعد ہوں گے جب صورت حال معمول کے مطابق آجاتی ہے۔