جوبائیڈن امریکہ کے 46 ویں صدر بن گئے، امریکی کانگریس کی توثیق۔
غیر ملکی میڈیا رپورٹس کے مطابق امریکی کانگریس نے صدر بائیڈن کی جیت کی توثیق کر دی ہے، ڈیموکریٹس کے جو بائیڈن امریکا کے 46 ویں صدر بن گئے ہیں۔
غیر ملکی میڈیا رپورٹ کے مطابق ریاست پنسلوانیا میں جوبائیڈن کی جیت پر مخالف پارٹی اور ان کے حامیوں کے اعتراضات کو کانگریس کے دونوں ایوانوں نے مسترد کر دیا ہے۔
امریکی میڈیا کاکہنا ہے کہ سینیٹ کے بعد ایوان نمائندگان میں بھی پنسلوانیا میں بائیڈن کی جیت پر اعتراض بھاری اکثریت سے مسترد کیا گیا ہے۔
یاد رہے کہ امریکی صدر جوبائیڈن کی تقریبِ حلف برداری 20 جنوری کو ہوگی، تاہم واشنگٹن کی میئر موریل باؤزر نے امریکہ کے دارالحکومت میں ہنگامہ آرائی کے باعث نو منتخب صدر جو بائیڈن کی تقریب حلف برداری تک امن و امان برقرار رکھنے کیلئے 21 جنوری تک ایمرجنسی نافذ کر دی ہے۔