سینئر صوبائی وزیر شرجیل انعام میمن نے کہا ہے کہ محرم الحرام کے جلوسوں اور مجالس کی سکیورٹی کے فول پروف انتظامات کیے گئے ہیں جس کے لیے 49 ہزار سے زائد اہلکاروں کو تعینات کیا گیا ہے۔
سندھ کے سینئر وزیر شرجیل انعام میمن نے پریس کانفرنس کرتے ہوئے کہا کہ محرم الحرام کے حوالے سے وزیراعلیٰ سندھ نے میٹنگز کی ہیں اور امن وامان کے حوالے سے سکیورٹی پلان ترتیب دیے ہیں، علمائے کرام سے بھی مشاورت کی گئی ہے۔
صوبائی وزیر اطلاعات وٹرانسپورٹ نے کہا کہ کراچی میں محرم الحرام کے جلوسوں کی سکیورٹی کے لیے 49 ہزار سے زائد اہلکاروں کو تعینات کیا گیا ہے۔
انہوں نے بتایا کہ کراچی میں محرم الحرام کے جلوسوں کی حفاظت کے لیے 35114 پولیس اہلکار اور 14000 سے زائد سکیورٹی ایجنسیز کے اہلکار ڈیوٹی سرانجام دیں گے۔ سندھ بھر میں ہونے والی مجالس اور جلوسوں کی حفاظت کے لیے 35,116 اہلکار ڈیوٹی پر موجود ہوں گے۔
انہوں نے بتایا کہ کراچی، حیدرآباد، سکھر، لاڑکانہ، میرپورخاص اور شہید بینظیر آباد میں 8 تا 10محرم الحرام 49,662 اہلکار ڈیوٹیاں سرانجام دیں گے۔
دریں اثناء وزیرداخلہ سندھ ضیاء الحسن لنجار نے 7، 8، 9 اور یوم عاشور کے جلوسوں کی فول پروف سکیورٹی یقینی بنانے کی ہدایت کی ہے۔
ضیاء الحسن لنجار نے ایک بیان میں کہا کہ محرم سکیورٹی کے حوالے سے علمائے کرام و اکابرین کو بھی آن بورڈ لیا جائے۔ محرم سکیورٹی حکمت عملی اور لائحہ عمل کو ہر سطح پر نافذالعمل بنایا جائے۔
انہوں نے کہا کہ تمام ڈی آئی جیز، ایس ایس پیز محرم سکیورٹی اہداف و ترجیحات پر بذات خود فوکس رکھیں۔ پیٹرولنگ، اسنیپ چیکنگ اور پکٹنگ کو اس طرح ترتیب دیں کہ تمام مرکزی مساجد امام بارگاہوں اور دیگر اہم مقامات کی کڑی نگرانی کی جاسکے۔