کہتے ہیں کہ ماں باپ اپنی اولاد کو اچھے سے اچھا کھلاتے اور پہناتے ہیں لیکن بعض اوقات اس قسم کے واقعات بھی انسانی آنکھ دیکھتی ہے جس کے بعد انسانیت سے بھروسہ اٹھ جاتا ہے۔
یوکرین کی پولیس نے ایک ایسی خاتون کو گرفتار کیا ہے جس پر الزام ہے کہ وہ اپنے بچوں کو زبردستی کتوں کا گوشت کھلاتی تھی، تاہم پولیس کی کارروائی کے دوران دو بچوں کو بھی بازیاب کروا لیا گیا۔
ڈیلی میل کی ایک رپورٹ کے مطابق شمال مشرقی یوکرین کے شہر خارکیو میں پولیس نے ایک فلیٹ سے دو ایسے دو بچوں کو اپنی تحویل میں لیا ہے جن کی ماں ان کو محض اس لیے آوارہ کتوں کا گوشت کاٹ کر کھلاتی تھی تاکہ ان کا پیٹ بھرا جا سکے۔
رپورٹ کے مطابق چار سالہ بچہ اور اس کا دوسالہ بھائی ایک انتہائی غلاظت سے بھرے اور بدبودار فلیٹ میں بند کیے گئے تھے اور ان کی 30 سالہ ماں للیہ گرینینکو اور نانی انہیں باہر بھی جانے نہیں دیتی تھیں۔
پڑوسی نے فلیٹ سے شدید بدبو آنے پر پولیس کو اطلاع کی جس کے بعد کارروائی کی گئی اور خواتین کو گرفتار کر کے بچوں کو بازیاب کروایا گیا۔
پولیس کا کہنا ہے کہ لاپرواہی کا الزام ثابت ہونے پر بچوں کی ماں کو پانچ سال قید کی سزا کا سامنا کرنا پڑسکتا ہے۔