نیوزی لینڈ کے ایک یوٹیوبر نے مشہور و معروف ریسنگ کار لیمبرگنی کا ماڈل تیار کر لیا ہے اس ماڈل ریسنگ کار کی خاص بات یہ ہے کہ اسے گتے سے تیار کیا گیا ہے، یہ لیمبرگنی 10 ہزار ڈالرز سے بھی زائد میں فروخت ہوئی جوکہ پاکستانی 15 لاکھ سے زائد رقم بنتی ہے، یہ رقم انہوں نے ایک خیراتی ادارے کو عطیہ کر دی۔
یوٹیوبر ڈیوڈ جونز نے اس ماڈل کار کو بڑے ہی ماہر انداز سے گتے کو تراش کر بنایا، اس ماڈل کا ر کی لمبائی 1.65 میٹر ہے اور چوڑائی 3.78 ہے جبکہ اس کار کا نام یوٹیوبر ڈیوڈ جونز نے“ کارڈ بوگنی“ رکھا ہے اور یہ کار بنانے میں انہیں 2 ہفتوں کا وقت لگا ۔
اس کے علاوہ اس کار کے مالک ڈیوڈجونز نے کہا کہ انہیں اس گاڑی کا ماڈل بنانے کا خیال اس وقت آیا جب انہوں نے امریکا کے شہر لاس اینجلس میں ایک لیمبرگنی کار خود چلائی ۔
واضح رہے کہ اس کار کا سائز اصل لیمبرگنی سے کچھ بڑا ہے جبکہ کار کے مالک کا کہنا تھا کہ مجھے اندازہ بھی نہیں تھا کہ میری محنت کا اتنا معاوضہ ملے گا میں تو یہ سوچ کر بیٹھا تھا کہ کم از کم یہ کار 50 ڈالر میں فروخت ہوگی۔