وزیر داخلہ شیخ رشید اور کویت کے وزیراعظم شیخ صباح خالد الحامد الصباح کے درمیان ملاقات ہوئی اور ملاقات میں کویتی وزیر داخلہ اور پاکستانی سفیر بھی شامل تھے،اس ملاقات میں دوطرفہ تعلقات اور باہمی امور کی دلچسپی کے بارے میں گفتگو کی گئی ۔ اور شیخ رشید نے وزیراعظم عمران خان کا خصوصی مراسلہ بھی کویت کے وزیراعظم کو پیش کیا ۔
ملاقات کے بعد جاری اعلامیے میں کہا گیا کہ سن 2011 سے پاکستانی شہریوں کی کویت میں آمد بند تھی جس پر بڑی پیشرفت ہوئی ہے اور اب دونوں ممالک نے فیملی ،بزنس اور ٹیکنیکل ویزا بحال کر دیا ۔اب معاہدے کے مطابق پاکستانیوں کو بھی کویت کے ویزے جاری کیے جائیں گے اور غیر ممالک میں موجود پاکستانی آن لائن ویزا لے کر کویت جا سکیں گے۔
اس کے علاوہ کویتی وزیراعظم کا کہنا تھا کہ دونوں ممالک کے درمیان تعلقات سات دہائیوں پر محیط ہیں مزید یہ کہ پاکستان اور کویت کی عوام کے درمیان محبت اوراعتماد کا رشتہ ہے۔ اس موقع پر وزیر داخلہ شیخ رشید کا کہنا تھا کہ پاکستانی کویت کو اپنا دوسرا گھر مانتے ہیں ۔