چین کے صوبے جیانگسو میں برڈ فلو وائرس سے انسانی انفیکشن کی تصدیق ہوگئ ہے۔
تفصیلات کے مطابق چین کے مشرقی صوبے جیانگسو میں 41 سالہ شخص میں برڈ فلو وائرس کی تصدیق ہوئی ہے۔ بیجینگ کے نیشنل ہیلتھ کمیشن (این ایچ سی) کا کہ کہنا ہے کہ 41 سالہ شخص میں وائرس کی علامات پائی گئی ہین۔
برطانوی خبر رساں ایجنسی کے مطابق مریض کی حالت خطرے سے باہر ہے، تاہم کمیشن کی جانب سے متاثر شخص سے متعلق تفصیل نہیں بتائی گئی ہے۔ جبکہ کیمشن نے واضح کیا ہے کہ متاثر شخص کے گھر والوں میں وائرس کی علامات ظاہر نہیں ہوئی ہیں۔
کمیشن کا کہنا ہے کہ برڈ فلو کے پھیلاؤ کا خطرہ نہایت کم ہے۔
برڈ فلو کیا ہے؟
فوڈ اینڈ ایگریکلچر آرگنائزیشن کا کہنا ہے کہ یہ وائرس اکثر پرندوں میں نمودار ہوتا ہے، زیادہ خطرناک نہیں ہے۔ اس وائرس سے متعلق زیادہ معلومات اب تک سامنے نہیں آئی ہیں۔
عالمی ادارہ صحت کے مطابق اس وائرس سے متعلق کچھ کہنا قبل ازوقت ہوگا، مریض کو وائرس کہاں سے لگا ہے اور مقامی آبادی میں مزید کوئی کیس سامنے نہیں آیا۔ ان سب سوالوں کے جوابات اب تک معلوم نہیں ہوسکے ہیں۔
واضح رہے ایوین انفلوئنزا وائرس پرندوں پر کم اثر انداز ہوتا ہے، جبکہ انسانوں کے لیے انتہائی خطرناک ثابت ہوتا رہا ہے۔ چین میں اس وائرس کی قسم ایچ 7 این 9 سے 2017 میں 700 کے قریب افراد ہلاک ہوئے تھے۔ تاہم ایچ 7 این 9 کے انسان سے دوسرے انسان میں منتقل ہونے کے واقعات کم ہی ہیں۔