چیئرمین پاکستان تحریک انصاف عمران خان کی ٹانگ پر گولیاں لگنے کی حقیقت پٹی کھلتے ہی سامنے آگئی، سابق وزیراعظم کی ٹانگ پر زخموں کے نشانات سے تنقید کرنے والوں کو جواب مل گیا۔
سابق وزیراعظم عمران خان پر گزشتہ دنوں وزیرآباد میں لانگ مارچ کے دوران قاتلانہ حملہ ہوا تھا جس میں مبینہ ملزم نے چیئرمین پی ٹی آئی کو قتل کرنے کی کوشش کی تھی تاہم خوش قسمتی سے عمران خان اس حملے میں بچ گئے تھے۔
حملہ آور کا نشانہ خطا ہونے کے باوجود عمران خان کی ٹانگ پر گولی لگی جس سے ان کی ٹانگ پر زخم آئے تھے تاہم مخالفین اور سوشل میڈیا صارفین کی جانب سے حملے کے بعد عمران خان کے کنٹینر سے باہر آنے اور اسپتال میں پٹیوں والی تصویروں پر شدید تنقید کی گئی تھی۔
ناقدین کا کہنا تھا کہ زمین پر کھڑے ملزم کی فائرنگ سے کنٹینر کی چھت پر عمران خان کی ٹانگ پر گولیاں لگنا ممکن نہیں اور عمران خان کی ٹانگوں پر لگی کریپ بینڈج پر بھی شکوک و شبہات کا اظہار کیا گیا تھا۔
آج سوشل میڈیا پر آنے والی ویڈیو میں دیکھا گیا کہ عمران خان کی ٹانگ پر زخم موجود ہیں جس سے ناقدین کو بھی جواب مل گیا ہے۔