پوری دنیا ان دنوں فٹ بال کے بخار میں مبتلا ہے، مسلمان ملک میں انعقاد کے بعد مسلمان ٹیموں کی کامیابیوں نے مخالفین کی نیندیں اڑا رکھی ہیں، پہلی بار میگا ایونٹ کے سیمی فائنل میں پہنچنے والی مراکش کی ٹیم اس وقت پوری دنیا کی توجہ کا مرکز ہے، 4 کروڑ کے قریب آبادی کے ملک نے دنیا کے بڑی بڑی طاقتوں کو گھٹنے ٹیکنے پر مجبور کردیا ہے۔
مراکش کی تاریخی اور ناقابل فراموش فتوحات کے پیچھے سب سے بڑا کردار گول کیپر یاسین بونو کا رہا ہے، شاندار پرفارمنس نے یاسین بونوکو پوری دنیا میں ایک سپر اسٹار بنادیا ہے، یہاں آپ کو یہ جان کر بہت حیرت ہوگی کہ یاسین بونو کا تعلق پاکستان ہے؟۔
پاکستان کے شہری اس بات پر تو متفق ہیں کہ یاسین بونو پاکستانی ہیں لیکن اب تک شہر کا کنفرم نہیں ہوسکا، کسی نے یاسین بونو کا نام ہی بدل دیا ہے اور یہ کہنا ہے کہ یاسین خان کا تعلق بلوچستان کے ضلع لورالائی سے ہے، کوئی کہتا ہے کہ مراکش فٹ بال ٹیم کے گول کیپر کوٹ ادو کے رہائشی ہیں، کچھ لوگ کہتے ہیں کہ مراکشی گول کیپر یاسین کا تعلق ضلع راجن پور سے ہے یہ اپنا سرائیکی بھائی ہے۔
سرائیکی برادری نے تو یاسین بونو کی جائے پیدائش بھی ڈھونڈ نکالی ہے، سرائیکی بھائیوں کا کہنا ہے کہ یاسین کی پیدائش نشر اسپتال ملتان میں ہوئی جبکہ ان کا آبائی گاؤں فاضل پور ہے۔ تعلیم کے حصول کے لئے مراکش گئے تھے اور وہاں کالج کی فٹ بال ٹیم میں اچھی پرفارمنس دیتے دیتے مراکش کی قومی فٹ بال ٹیم میں شامل ہو گئے۔
اب جب یاسین بونو کی پاکستان میں جائے پیدائش ڈھونڈھنے کا مقابلہ ہورہا ہے تو سندھی بھائی کیوں پیچھے رہیں۔ سندھی بھائیوں کا کہنا ہے کہ یاسین بونو کا تعلق سندھ کے شہر گمبٹ سے ہے۔ وہ گمبٹ کے شیخ قبیلے میں پیدا ہوئے اور گاؤں کلیری میں بڑے ہوئے اور وہیں سے فٹبال کی شروعات کی۔
حقوق کا رونا رونے والے بھی کیوں پیچھے رہیں تو۔۔۔ اب ایک دعویٰ یہ ہے کہ یاسین کا تعلق کوئٹہ سے ہے۔ بہترین حقوق نہ ملنے کی وجہ اور اچھی تعلیم نہ ہونے اور حکومت کی طرف سے سپورٹ نہ ملنے کی وجہ سےاعلیٰ تعلیم کیلئے مراکش چلے گئے تھے۔
پاکستانیوں کا کہنا ہے کہ یاسین بونو لیبر ویزے پر مراکش گئے، ویلڈنگ کا کام کیا۔ دیہاڑیاں لگائیں اور جمعے کی چھٹی میں فٹ بال کھیلنے کا موقع ملا۔ کچھ لوگ تو یہ بھی کہتے ہیں کہ یاسین بونو کام نہ ملنے پر کئی کئی روز بھوکا رہتے تھے۔ یہ وہ دعوے اور کچھ میمز تھیں جو پاکستانی سوشل میڈیا صارفین کی جانب سے وائرل ہوئیں۔
آئیے اب آپ کو بتاتے ہیں کہ یاسین بونو کا تعلق کہاں سے ہے۔ تو جناب ۔۔یاسین بونو کا تعلق مراکش سے ہی ہے۔ یاسین بونو کینیڈا میں پیدا ہوئے اور ان کے والد مراکشی ہیں۔ یاسین بونو کی زندگی کا زیادہ حصہ اسپین میں گزرا اور اسپینش لیگ ۔۔لالیگا۔۔ کا حصہ رہے ہیں۔
مراکش کی قومی ٹیم کے فٹ بالر یاسین بونو کا پاکستان سے براہ راست کوئی تعلق نہیں ہے بطور مسلمان وہ ہمارا ہیرو ہی نہیں بلکہ ہمارا بھائی بھی ہے۔ اس لئے جو جیسے چاہے تعلق جوڑ سکتاہے۔