پاکستان میں مہنگائی اور بیروزگاری کی وجہ سے جرائم کی وارداتوں میں بھی اضافہ دیکھنے میں آرہا ہے، کئی بار نوجوان کسی خاص مقصد کیلئے چوری جیسے اقدام پر بھی مجبور ہوجاتے ہیں اور پکڑے جانے پر انہیں سزاؤں کا سامنا بھی کرنا پڑتا ہے، یہ اسٹوری ایک ایسے نوجوان کی ہے جس نے چوری کے بعد مکان مالکن سے شادی کرلی۔
سوشل میڈیا پر وائرل ویڈیو میں فضہ نامی خاتون نے بتایا کہ ان کے شوہر نبیل ان کے گھر میں پیسے چرانے کیلئے آئے اور بعد میں ان سے شادی ہوگئی۔
نبیل نامی شخص نے بتایا کہ مجھے فیس ادا کرنے کیلئے 10 ہزار روپے کی ضرورت تھی تو میں نے ان کے گھر میں چوری کی، وہاں 3 لاکھ کے قریب رقم موجود تھی لیکن میں نے اپنی ضرورت کے 10 ہزار چوری کئے لیکن فضہ کے والد نے پولیس کو بلاکر مجھے گرفتار کروادیا۔
انہوں نے بتایا کہ پولیس نے روایتی طور پر ڈنڈوں سے خوب خاطر تواضع کی ، فضہ کے والد تھانے آئے اور مجھے رہائی دلوائی۔ بعد میں وہ مجھے اپنے گھر لے گئے اور باقی پیسے چھوڑ کر 10 ہزار چرانے کی وجہ پوچھی۔
نبیل کا کہنا تھا کہ جب میں نے فضہ کے والد کو اپنی مجبوری کا بتایا تو انہوں نے فضہ کو مجھے آن لائن کام سکھانے کا مشورہ دیا جہاں سے ہماری دوستی ہوئی۔ نبیل کے مطابق انہوں نے اپنی پہلی کمائی سے فضہ کے والد اور فضہ کو گفٹ دیا۔
انہوں نے بتایا کہ مجبوری میں چوری لیکن باقی رقم چھوڑنے کی وجہ سے فضہ کی فیملی نے مجھے معاف کردیا اور بعد میں فضہ سے شادی کروادی اور آج ہم اچھی آمدن کی وجہ سے خوشگوار زندگی گزار رہے ہیں۔