سعودی عرب نے جی سی سی ممالک کے تمام اقامہ ہولڈرز کے لیے سیاحتی ویزوں کا اعلان کردیا ہے، الیکٹرانک ویزے کے اجرا کےلیے کسی بھی پیشے سے تعلق رکھنے والے غیرملکی درخواست دینے کے اہل ہوں گے۔
سعودی حکومت کے مطابق خلیج تعاون کونسل کے ممالک میں اقامہ پرمقیم غیر ملکی خواہ انکا پیشہ کوئی بھی ہو وہ سیاحتی ویزے پر سعودی عرب آنے کے اہل ہوں گے اور سیاحتی ویزے پرآنے والے مسلمان سیاحوں کوعمرہ کی ادائیگی کی بھی اجازت ہوگی۔
قبل ازیں وزارت سیاحت نے اس حوالے سے کہا تھا کہ مملکت کے سیاحتی ویزے کا دائرہ وسیع کرنے کےلیے حکمت عملی مرتب کی جارہی ہے جس کا اعلان کیا جائے گا۔ سیاحتی ویزے کے حوالے سے قواعد کی منظوری وزیرسیاحت احمد بن عقیل الخیطب نے جاری کی ہے۔
سیاحتی ویزے کے حوالے سے جاری شرائط میں مزید کہا گیا ہے کہ سیاحتی ویزے کے لیے لازمی ہے کہ جی سی سی میں مقیم درخواست گزار غیرملکی کا اقامہ کم ازکم 3 ماہ کےلیے کارآمد ہو۔
وزارت سیاحت کا کہنا ہے کہ سیاحتی ویزے مرکزی درخواست دہندہ کے ساتھ آنے والے اول درجے کے رشتہ دار اورکفیلوں کے ہمراہ آنے والے ملازمین کے لیے جاری کرایا جاسکتا ہے۔
سیاحتی ویزے پرآنے والوں کےلیے مقررہ قواعد میں کہا گیا ہے کہ مملکت میں سیاحتی ویزے پرآنے والے مقامی قوانین کا احترام کریں اس حوالے سے ان کےلیے لازم ہوگا کہ وہ اپنے ہمراہ شناختی دستاویزاپنے ہمراہ رکھیں۔
سیاحتی ویزے پرآنے والوں کو حج ادا کرنے کی اجازت نہیں ہوگی نہ ہی وہ افراد حج سیزن کے دوران عمرہ کی ادائیگی کے لیے مکہ مکرمہ جاسکیں گے۔