انگلینڈ میں ایک ریٹائرڈ پولیس والے نے لوگوں کے گم ہوجانے والے کتوں کو اپنے ڈرون کی مدد سے ڈھونڈھنا شروع کردیا۔
فل جیمز نے "ڈرون ٹو ہوم" کے نام سے ایک ادارہ بنایا اور اس کی مدد سے وہ لوگوں کے گم ہوجانے والے کتوں کو ڈھونڈھ کر دیتے ہیں۔ جیمز کی شہرت میں اس وقت اضافہ ہوا جب انہوں نے ایک ۳ دن سے لاپتہ کتے کو اپنے ڈرون سے ڈھونڈھ نکالا اور اسے حفاظت کے ساتھ اس کی فیملی سے ملوادیا۔
جیمز کا کہنا تھا کہ انہوں نے کبھی نہیں سوچا تھا کہ ان کا تلاش اور مدد کا جذبہ ان کے اس ادارے کو اتنا آگے لے جائے گا۔ انہوں نے مزید کہا کہ وہ چاہتے ہیں کہ وہ پیسے جمع کریں اور تھرمل ڈرون خریدیں۔ انہوں نے اس خواہش کا بھی اظہار کیا کہ وہ دنیا بھر میں ڈرون سے لوگوں کو ان کے کھوئے ہوئے کتے ڈھونڈھنے میں مدد کریں۔
جیمز کا ادارہ اب تک ۱۴۰۰ افراد کی مدد کرچکا ہے۔ انہوں نے یہ ادارہ اکیلے بنایا لیکن ۲۰۲۱ میں کام کا دباؤ بڑھ جانے کی وجہ سے لوگوں سے رضاکارانہ طور پر ان کے ساتھ مل کر کام کرنے کی درخواست کی۔ ان کا ادارہ ڈرون کیمرہ استعمال کرنے کے حوالے سے کورس بھی کرواتا ہے۔
جیمز کے اس کام کو بیشتر لوگوں نے سراہا اور جن لوگوں کی انہوں نے مدد کی تھی وہ ان کے شکرگزار بھی ہیں اور انہوں نے جیمز کے کام کے حوالے سے ان کی تعریفیں بھی کیں۔ جیمز نے بہت سے جانوروں سے پیار کرنے والے لوگوں کو اب اپنے ادارے کا حصہ بنالیا ہے۔