پاک فوج کے شعبہ تعلقات عامہ نے کہا ہے کہ سابق وزیراعظم و چیئرمین تحریک انصاف عمران خان کے من گھڑت اور بدنیتی پر مبنی الزامات قابل مذمت اور ناقابل قبول ہیں۔
آئی ایس پی آر کا کہنا ہے کہ عمران خان نے بغیرثبوت انتہائی بے بنیاد الزامات لگائے، حاضر سروس فوجی افسر پر بغیرثبوت الزامات انتہائی غیر ذمہ دارانہ ہیں۔جھوٹے الزامات لگانا بند کریں اور قانونی راستہ اختیار کریں۔
ایک سال سے وطیرہ رہا ہے کہ فوجی اور انٹیلی جنس افسران کو ٹارگٹ کیا جاتا ہے اور سیاسی مقاصد کیلئے سنسنی خیز پروپیگنڈا کیا جاتا ہے۔من گھڑت اور بدنیتی پر مبنی الزام انتہائی قابل مذمت اور ناقابل قبول ہیں۔ ادارہ غلط اور بدنیتی پر مبنی بیانات اور پروپیگنڈے پرقانونی کارروائی کا حق محفوظ رکھتا ہے۔
یاد رہے کہ وزارت عظمیٰ سے ہٹائے جانے کے بعد چیئرمین تحریک انصاف گزشتہ ایک سال سے مسلسل پاک فوج کے حاضر سروس اور ریٹائرڈ افسران کو تنقید کا نشانہ بنارہے ہیں۔
عمران خان اپنے حالیہ بیانات میں سابق آرمی چیف قمر جاوید باجوہ کے علاوہ اس وقت حاضر سروس افسران کیخلاف بھی سنگین الزامات عائد کررہے ہیں تاہم آئی ایس پی آر نے انہیں قانونی کارروائی کی وارننگ دیدی ہے۔