فیصل قریشی ایک مشہور پاکستانی اداکار ہیں جو اپنی شاندار اداکاری کی وجہ سے جانے جاتے ہیں۔ شائقین انہیں بہت پسند کرتے ہیں اور ان کے تمام نئے ٹیلی ویژن پروجیکٹس کو زبردست رسپانس دیتے ہیں۔ ویسے تو اداکار کی ذاتی زندگی ان کی ابتدائی زندگی کے چند تجربات کی وجہ سے ہمیشہ متنازع رہی ہے لیکن، فیصل قریشی اپنے تمام بچوں سے بے حد پیار کرتے ہیں۔ ان کا خیال ہے کہ بچوں کو اپنی زندگی میں بااختیار اور خود مختار ہونا چاہیے۔
حال ہی میں فیصل قریشی نے پہلی بار اپنی بڑی بیٹی حنیش قریشی کے بارے میں بات کی۔
نجی ٹی وی شو کے میزبان احمد علی بٹ نے اداکار کو ان کی بیٹی ہانش قریشی کے بچپن کی تصویر دکھا کر ان سے رائے طلب کی؟
اس پر فیصل قریشی نے بتایا کہ، "بیٹی کی عمر 27 سے 28 سال ہے اور وہ اپنی لائف میں مصروف ہے، ہانش نے 1 سے 2 شوبز پراجیکٹس بھی کیے ہیں لیکن، مجھے نہیں لگتا کہ وہ آگے فیلڈ میں کام کو جاری رکھ سکے گی۔"
فیصل قریشی نے مزید کہا کہ، میں اپنی بیٹی کو مجبور نہیں کرتا کہ اسے شوبز میں کام کرنا چاہیے اور یا نہیں کرنا چاہیے، اس حوالے سے ایک روز مجھے فہد مصطفیٰ کی بھی کال آئی تھی جس پر انہوں نے کہا تھا کہ فیصل بھائی! ہانش پراجیکٹ میں کام کے حوالے سے سنجیدہ ہے، لیکن میں نے فہد سے کہا کہ اگر آپ کو لگتا ہے کہ وہ کر سکتی ہیں تو دیکھ لیں۔
اداکار نے اپنے بھانجے اور اداکار دانیال کی مثال دیتے ہوئے کہا کہ، "میرا بھانجا دانیال اس وقت 7 سے 8 ڈرامے کررہا ہے، اس کے لیے لوگ مجھے کال کرتے ہیں تب بھی میں انہیں یہی کہتا ہوں کہ اگر پراجیکٹ میں اسکی ضرورت ہے تو لو، میں یہ نہیں کہتا کہ میں ماموں ہوں تو اس کو کام ملنا چاہیے۔ میں پراجیکٹس میرٹ پر دیے جانے کے حق میں ہوں کیوں کہ جو پراجیکٹ سفارش پر کسی اداکار کو دیے جاتے ہیں وہ اسکرین پر نظر آرہے ہوتے ہیں کہ سفارشی ہیں۔"