اوکاڑہ میں سدھو موسے والا کے نوعمر مداح کی گرفتاری اور پھر رہائی

image
پاکستان کے صوبہ پنجاب کے شہر اوکاڑہ میں آنجہانی انڈین پنجابی گلوکار سدھو موسے والا کی برسی کے موقعے پر سالانہ ختم کے پروگرام کے بعد فائرنگ کی دعوت دینے پر گرفتار ہونے والے ملزم کو پولیس نے رہا کر دیا ہے۔

سوشل میڈیا پر شرجیل ملک نامی لڑکے کی جانب سے سدھو موسے والا کی برسی کے موقعے پر سالانہ ختم کے پروگرام کا پوسٹر جاری کیا گیا تھا جس میں ختم کے بعد فائرنگ کرنے کا بھی اعلان کیا گیا۔

صرف یہی نہیں، سدھو موسے والا کے مداح نے علاقے کے بدمعاشوں اورجٹ برادری کو بھی ختم میں آنے کی دعوت دی۔

معروف گلوکار کے سالانہ ختم کی دعوت دینے والے ملزم کو پولیس کے مطابق گرفتار کر لیا گیا تھا، تاہم ملزم کے کم عمر ہونے کے باعث اسے پولیس نے تنبیہ کرتے ہوئے چھوڑ دیا۔

پولیس کے پہلے بیان کے مطابق ’سدھو موسے والا (انڈین سنگر) کے سالانہ ختم اوکاڑہ میں کروانے کا دعوے دار ملزم گرفتار کر لیا گیا۔ اوکاڑہ تھانہ بی ڈویژن پولیس نے بروقت کارروائی کرتے ہوئے ملزم کو گرفتار کر لیا۔ سدھو موسے والا کے فین نے سوشل میڈیا پر ختم میں بدمعاشوں اور جٹ برادری کو شرکت کی دعوت دی۔‘

پولیس کا مزید کہنا تھا کہ ’ملزم نے ختم کے بعد ہوائی فائرنگ کا خاص پروگرام بھی ترتیب دیا تھا۔ واقعہ پر ڈی پی او نے نوٹس لیتے ہوئے مقامی پولیس کو ملزم کو گرفتار کرنے کا حکم دیا۔ کم عمر ملزم کی شناخت شرجیل کے نام سے ہوئی ہے۔‘

ملزم کو تنبیہ کرتے ہوئے رہا کرنے پر پولیس کا کہنا ہے کہ ’حراست میں لینے کے بعد دیکھا گیا کہ اُن کی عمر بہت چھوٹی ہے، جس پر پولیس نے مقدمہ درج کرنے کی بجائے تنبیہ کرتے ہوئے انہیں چھوڑ دیا ہے، جس کے بعد وہ اپنے گھر جا چکے ہیں۔‘

سدھو موسے والا کی انڈیا سمیت پاکستانی پنجاب میں بھی بے حد مقبولیت برقرار ہے جس کے باعث ان کے پاکستانی مداح بھی انہیں خوب خراج تحسین پیش کرتے ہیں۔

#Sidhumoosewala may be the first Indian Punjabi singer to make a place on a Pakistani truck.

In Pakistan Your picture on a Pakistani truck means you are in the hearts of the people. pic.twitter.com/8ka8MvM0na

— blue account (@iffiViews) June 13, 2022

سدھو بھی اپنے پاکستانی مداحوں سے بہت خوش نظر آتے تھے اور ایک مرتبہ کنسرٹ میں انہوں نے پاکستان آںے کا بھی اعلان کیا تھا، لیکن بدقسمتی سے انہیں ان کی زندگی میں یہ موقع نہ مل سکا۔

گذشتہ برس اوکاڑہ میں ہی سدھو موسے والا کے مداحوں کی جانب سے ان کے قتل کی مذمت کا پوسٹر وائرل ہوا تھا۔

#sidhumoosewala - Somewhere in Okara city, #Pakistan pic.twitter.com/XQ1DIqZ7ig

— Shiraz Hassan (@ShirazHassan) May 31, 2022

خیال رہے کہ مشہور پنجابی سنگر سدھو موسے والا کو 29 مئی 2022 کو انڈین پنجاب کے ضلع مانسہ میں دشمنی کی آڑ میں قتل کردیا گیا تھا۔

 


News Source   News Source Text

مزید خبریں
پاکستان کی خبریں
مزید خبریں

Meta Urdu News: This news section is a part of the largest Urdu News aggregator that provides access to over 15 leading sources of Urdu News and search facility of archived news since 2008.