ہوا سے بھی کوئی چیز بنائی جا سکتی ہے ایسا پہلی بار دیکھنے میں آیا ہے جس نے سوشل میڈیا صارفین کو بھی حیرت میں ڈال دیا ہے۔
فرانسسی ڈیزائنر کوپرنی ( Coperni) کی جانب سے امریکی خلائی ادارے ناسا کے سِلیکا ایروجیل نینو-مٹیریل سے ایک پرس تیار کرلیا گیا۔
غیر ملکی میڈیا رپورٹ کے مطابق خلاء میں غبار کو گرفت میں لینے اور مارس روور پر حفاظتی تہہ کے طور پر استعمال کیا جانے والے اس مواد کو اب فیشن کے طور پر استعمال کیا جا رہا ہے۔
دنیا پر موجود سب سے کم وزن ٹھوس مواد سے بنایا جانے والا یہ بیگ صرف 33 گرام وزنی ہے۔ یہ وزن چھ اے فور سائز صفحات کے وزن سے تھوڑا زیادہ ہے۔
اگرچہ دیکھنے میں یہ تھوڑا نازک ہے لیکن کوپرنی کے مطابق یہ بیگ ایک آئی فون کا وزن باآسانی برداشت کر سکتا ہے۔
انسٹاگرام پر شائع کی جانے والی ایک پوسٹ میں کوپرنی نے نصف شفاف دِکھنے والے بیگ کی تصویر شائع کی اس کو ایئر سوائپ بیگ کا نام دیا۔ پوسٹ کے مطابق یہ بیگ 99 فی صد ہوا اور ایک فی صد گلاس سے تیار کیا گیا ہے۔
ہم، سوشل میڈیا صارفین کی جانب سے اس کے ممکنہ استعمال پر کئی سوالات اٹھائے گئے۔
ایک صارف کا کہنا تھا کہ اس بیگ میں کیا رکھا جاسکتا ہے اور کیا یہ گرنے پر ٹوٹ جاتا ہے۔
ایک اور صارف نے کہا کہ کیا اس کو بیگ کی طرح استعمال بھی کیا جاتا ہے؟