اسلام آباد۔3مئی (اے پی پی):وزیر مملکت برائے آئی ٹی شزہ فاطمہ نے کہا ہے کہ موجودہ دور میں خواتین کی ٹیکنالوجی اور انٹرنیٹ تک رسائی بہت ضروری ہے، حکومت خواتین کو بااختیار بنانے اور ڈیجیٹل صنفی تقسیم کے خاتمہ کے لئے پرعزم ہے۔ جمعہ کو وزارت آ ئی ٹی وٹیلی کمیونیکیشن سے جاری کردہ بیان کے مطابق وزیر مملکت برائے آئی ٹی و ٹیلی کمیونیکیشن شزہ فاطمہ خواجہ سے پاکستان ٹیلی کمیونیکیشن اتھارٹی(پی ٹی اے) کے وفد نے ان کے دفتر میں ملاقات کی۔
ملاقات میں ملک میں ڈیجیٹل صنفی شمولیت اور ڈیجیٹل منتقلی کے حوالے سے گفتگو ہوئی۔پی ٹی اے وفد سے گفتگو میں وزیر مملکت برائے آئی ٹی شزہ فاطمہ نے کہا کہ موجودہ دور میں خواتین کی ٹیکنالوجی اور انٹرنیٹ تک رسائی بہت ضروری ہے، حکومت خواتین کو بااختیار بنانے اور ڈیجیٹل صنفی تقسیم کے خاتمہ کے لئے پر عزم ہے۔انہوں نے کہا کہ ڈیجیٹل صنفی شمولیت حکمت عملی کی تیاری خوش آئند ہے، ڈیجیٹل صنفی شمولیت حکمت عملی خواتین کے موبائل فون، آئی سی ٹی کے استعمال میں حائل رکاوٹوں کے خاتمے میں مددگار ثابت ہو گی، خواتین کی عملی شمولیت کا مقصد ایک ایسے ڈیجیٹل ایکو سسٹم کی تشکیل ہےجس کی پروان جدت، مساوی مواقع پر مشتمل ہے۔وفد نے کہا کہ پی ٹی اے ڈیجیٹل انکلوژن کے ذریعے ٹیلی کام شعبے کی ترقی و ترویج کے لئے ہر ممکن اقدامات اٹھا رہا ہے۔اس سے پہلے پی ٹی اے وفد نے وزیر مملکت برائے آئی ٹی شزہ فاطمہ کو ڈیجیٹل صنفی شمولیت پر پریذینٹیشن دی۔ وزیر مملکت برائے آئی ٹی نے پی ٹی اے ٹیم کے ڈیجیٹل صنفی شمولیت کے حوالے سے کام کو سراہا۔ پی ٹی اے وفد میں سیدہ شفق کریم، ڈائریکٹر وائرلیس لائسنسنگ اینڈ ہیڈ ڈیجیٹل جینڈر انکلوژن کمیٹی، ربیعہ پرویز، ڈائریکٹر کوآرڈینیشن اور ملاحت عبید، ڈائریکٹر پی آر شامل تھیں۔