اسلام آباد۔18مئی (اے پی پی):عجائب گھروں کی اہمیت بارے شعور اجاگر کرنے کے لئےآج( ہفتہ کو) عجائب گھر کا عالمی دن منایاگیا۔ اقوام متحدہ کے زیر اہتمام عجائب گھروں کا عالمی دن ہر سال18 مئی کو منایا جاتا ہے۔ اس دن کو منانے کا مقصد سیکھنے ، علم حاصل کرنے اور ثقافت کی ترقی سے استفادہ ہے۔ اقوام متحدہ کے ذیلی ادارہ (یونیسکو) نے 18 مئی کو عجائب گھروں کے بین الاقوامی دن کے طور پر نامزد کیا ہے ، اس سال کے دن کا موضوع ’’تعلیم اور تحقیق کے لئے عجائب گھر‘‘ منتخب کیا گیا ہے۔
اس دن کا ایک مقصد عالمی سطح پر عجائب گھروں کو متحد کرنا اور آگاہی بڑھانے ، تفہیم کو فروغ دینے اور متنوع ثقافتوں کی تعریف کو فروغ دینے میں ان کے اہم کردار پر زور دینا ہے۔ اس دن کی مناسبت سے متعدد سرکاری اور نجی اداروں نے عجائب گھروں کی اہمیت کو اجاگر کرنے کے لئے مختلف پروگرامزکا اہتمام کیا، تاکہ عام آدمی کو عجائب گھروں کی اہمیت سے روشناس کرانے کے ساتھ ساتھ تاریخی و ثقافتی ورثہ کے تحفظ کو یقینی بنایا جا سکے۔ عجائب گھر دانشورانہ ترقی اور ثقافتی تفہیم کے اہم مراکز میں شمار ہوتے ہیں،انسانیت کے مشترکہ ورثے کا حصہ ہیں ۔عجائب گھروں کو مسلح تصادم کے اوقات میں خصوصی تحفظ کی ضرورت ہوتی ہے۔ روسی شہری نکولس روئیرچ نے 1920 کی دہائی میں عجائب گھروں اور تاریخی و ثقافتی ورثہ کو محفوظ بنانے کے حوالہ سے بینر آف پیس کے قیام کے لیے فنکاروں اور دانشوروں کو متحرک کیا۔دوسری جنگ عظیم کے بعد یونیسکو نے کوشش جاری رکھی اور مسلح تنازعات کے اوقات میں ثقافتی اور تعلیمی اداروں کے تحفظ پر اضافی کنونشنز بھی منعقد ہوئے ۔ میوزیم ماضی ، حال اور مستقبل کی نسلوں کے درمیان رابطے بھی قائم کرتے ہیں ۔