دعا کرتا ہوں کہ وہ ہمیشہ خوش رہے۔۔ آغا علی نے شادی ٹوٹنے کی تصدیق کرتے ہوئے وجہ بھی بتا دی

"میں سمجھتا ہوں کہ شادیاں اس لیے ناکام ہوتی ہیں کیونکہ لوگ اپنے جیون ساتھی کو معمولی انسان سمجھنے لگتے ہیں،" آغا علی نے کہا۔ انہوں نے اپنی زندگی کے تلخ تجربات کو بیان کرتے ہوئے شادیوں کی کامیابی اور ناکامی کے حوالے سے اے آر وائی ڈیجیٹل کے پروگرام گڈ مارننگ پاکستان میں بات کی۔

اپنی شادی کے حوالے سے آغا علی نے کہا، "جب میں نے شادی کی تو وہ بالکل الگ تجربہ تھا۔ اس وقت کورونا وائرس عروج پر تھا اور ہر طرف یہی خدشات تھے کہ دنیا ختم ہونے والی ہے۔ میں نے بھی یہی سوچ کر شادی کا فیصلہ کیا۔"

آغا علی نے رشتے کی پائیداری پر زور دیتے ہوئے کہا، "شادی کرنا تو ایک عام بات ہے، لیکن اسے کامیاب بنانا اصل کام ہے۔ میاں بیوی کو ایک دوسرے کو سمجھنا اور ساتھ دینا چاہیے۔ یکطرفہ کوششوں سے رشتے نہیں چلتے؛ دونوں کو اپنا حصہ ڈالنا ضروری ہوتا ہے۔"

جب طلاق کے بارے میں سوال کیا گیا تو آغا علی نے کہا، "میں اپنی طلاق پر زیادہ بات نہیں کروں گا کیونکہ دوسرا فریق یہاں موجود نہیں۔ جو کچھ بھی ہوا، اسے قسمت کا لکھا سمجھا اور مہذب طریقے سے علیحدگی اختیار کر لی لیکن اللہ سے دعا ہے کہ وہ ہمیشہ کامیاب اور خوش رہے