سہ فریقی ٹورنامنٹ اور آئی سی سی چیمپئنز ٹرافی میں پاکستان کرکٹ ٹیم میں فخر زمان کے ساتھ دوسرے اوپنر کا فیصلہ ہوگیا۔
سہ فریقی ٹورنامنٹ اور آئی سی سی چیمپئنز ٹرافی میں فخر زمان کے ساتھ پاکستانی اننگز کا آغاز ٹیم کے سب سے مستند اور تجربہ کار بیٹر بابر اعظم کریں گے۔
قومی ٹیم انتظامیہ نے بابر اعظم کو میگا ایونٹ اور اس کے بعد پاکستان ٹیم میں وہ کردار ادا کے لیے کہا ہے جو بھارتی ٹیم میں سچن ٹنڈولکر ادا کرتے تھے۔ بابر اعظم نے یہ مشکل مشن مکمل کرنے پر آمادگی ظاہر کی ہے۔
پاکستان نے گزشتہ روز جس 15 رکنی ٹیم کا اعلان کیا ہے اس میں واحد ریگولر اوپنر فخر زمان ہیں جبکہ قومی سلیکٹر اسد شفیق نے کہا ہے کہ ان کے ساتھ دوسرے اوپنر کا فیصلہ میچ سے قبل کیا جائے گا۔
ٹیم انتظامیہ کے حددرجہ مصدقہ ذرائع نے تصدیق کی ہے کہ کیپ ٹاؤن ٹیسٹ کے پہلے دن پہلے گھنٹے پر جب صائم ایوب کے ٹخنے پر چوٹ لگی اسی وقت عاقب جاوید اور دیگر کوچز کو اندازہ تھا کہ صائم ایوب کی انجری سنجیدہ نوعیت کی ہے وہ دو سے ڈھائی ماہ میں فٹ ہوسکیں گے۔
اس لیے محمد رضوان ،عاقب جاوید، بیٹنگ کوچ شاہد اسلم اور سلیکٹرز نے بابر اعظم سے کئی نشستیں کیں اور انہیں قائل کیا گیا کہ وہ ٹیسٹ اور ون ڈے میں اننگز اوپن کریں گے۔
بابر اعظم کو بتایا گیا کہ سلیکٹرز چاہتے ہیں کہ آپ پاکستانی ٹیم میں وہ کردار ادا کریں جو بھارتی ٹیم میں سچن ٹنڈولکر نے ادا کیا تھا۔
سچن کا ٹیسٹ ڈیبیو1989میں کراچی میں ہوا لیکن1994-95میں سچن ٹنڈولکر اوپنر بن گئے اور اس دوران وہ ون ڈے کرکٹ میں بھارتی فتوحات کے مرکزی کردار رہے۔وہ مڈل آرڈر سے ریگولر اوپنر بن گئے۔
ذرائع کا کہنا ہے کہ بابر اعظم سے کہا گیا ہے کہ وہ اننگز اوپن کریں اور ون ڈے اننگز میں تمام اوورز کھیلنے کی کوشش کریں۔بابر اعظم نے سلیکٹرز ،کپتان اور ہیڈ کوچ کی بات سن کر قائل ہوگئے اور وہ مستقبل میں ون ڈے میچوں خاص طور پر سہ فریقی ٹورنامنٹ اور چیمپئنز ٹرافی میں اننگز اوپن کرنے کے لیے رضامند ہوگئے ہیں۔
ٹیم انتظامیہ کا خیال ہے کہ بابر اعظم سچن ٹنڈولکر کی طرح پاکستان کے ون ڈے اسکواڈ میں کلیڈی کردار ادا کریں گے۔
30سالہ بابر اعظم نے پاکستان کی جانب سے123ون ڈے انٹر نیشنل میں19سنچریوں اور23نصف سنچریوں کی مدد سے5957 رنز 56 کی اوسط سے بنائے ہیں۔وہ ٹی ٹوئنٹی میں ریگولر اوپننگ کرتے ہیں۔
بابر اعظم اس سے قبل 2015میں انگلینڈ کے خلاف 2 ون ڈے میچوں میں اننگز اوپن کرچکے ہیں لیکن انہوں نے زیادہ تر ون ڈے میچ تیسرے اور چوتھے نمبر پر کھیلے ہیں۔حالیہ سالوں میں بابر اعظم ون ڈاؤن پر بیٹنگ کرتے تھے۔