وزیراعظم شہباز شریف نے کہا ہے کہ عالمی برادری بھارت پر زور ڈالے کہ کشمیریوں کو اپنا فیصلہ خود کرنے دے۔ وزیراعظم شہبازشریف نے یوم یکجہتی کشمیر کے موقع پر پیغام دیتے ہوئے کہا ہے کہ جنوبی ایشیا میں پائیدار امن کے لیے مسئلہ کشمیر کا حل ہونا ضروری ہے۔
انہوں نے کہا کہ مقامی لوگوں کی حقیقی امنگوں کو دبانے سے دیرپا امن حاصل نہیں کیا جا سکتا، مشرق وسطیٰ کی حالیہ پیش رفت واضح کرتی ہے کہ تنازعات کو بھڑکنے نہ دیا جائے۔
حق خود ارادیت بین الاقوامی قانون کا ایک بنیادی اصول ہے، کشمیری عوام 78 سال گزرنے کے باوجود اپنا حق استعمال نہیں کرسکے۔
انہوں نے مزید کہا کہ جموں و کشمیر کا تنازع پاکستان کی خارجہ پالیسی کا کلیدی ستون رہے گا، پاکستان کشمیری عوام کی اخلاقی، سفارتی اور سیاسی حمایت جاری رکھے گا۔
صدرآصف علی زرداری نے یوم یکجہتی کشمیر کے موقع پر اپنے پیغام میں کہاکہ یہ دن بین الاقوامی برادری کی مظلوم کشمیری عوام کے بارے میں ذمہ داری کی یاددلاتاہے۔
انہوں نے کہاکہ اقوام متحدہ کو کشمیریوں سے اٹھہترسال قبل کئے گئے حق خودارادیت کے وعدے کی حمایت کرنی چاہیے۔
دریں اثناء چیئرمین جوائنٹ چیفس آف اسٹاف کمیٹی، مسلح افواج کے سربراہان اور پاکستان کی مسلح افواج نے بھارت کے غیر قانونی زیرقبضہ جموں و کشمیر کے عوام کے حق خود ارادیت کی منصفانہ جدوجہد میں ان کی غیر متزلزل حمایت کا اعادہ کیا ہے۔
آئی ایس پی آر نے ایک بیان میں کہا کہ پاکستان کی مسلح افواج بھارت کی طرف سے انسانی حقوق کی جاری سنگین خلاف ورزیوں کی شدید مذمت کرتی ہیں۔
بھارت کی جانب سے یہ خلاف ورزیاں عالمی قوانین، انسانی اصولوں اوربنیادی انسانی حقوق سے انحراف کے واضح ثبوت ہیں۔