انڈیا کی ریاست مغربی بنگال میں ایک سرکاری ملازم نے چھٹی کی درخواست مسترد ہونے پر اپنے چار ساتھیوں کو چاقو کے وار سے زخمی کر دیا۔این ڈی ٹی وی کے مطابق ملزم امیت کمار سرکار کولکتہ کے نیو ٹاؤن علاقے میں کریگاری بھون کے ٹیکنیکل ایجوکیشن ڈیپارٹمنٹ میں ملازمت کرتے ہیں۔
سوشل میڈیا پر شیئر ہونے والی ویڈیو میں امیت کمار کو دن کی روشنی میں ہاتھ میں خون آلود چاقو پکڑے شہر کی سڑکوں پر گھومتے دیکھا جا سکتا ہے۔ کچھ راہگیر اپنے موبائل فون پر ان کی ویڈیو بنا رہے ہیں جبکہ ملزم انہیں خبردار کرتا ہے کہ وہ اس کے قریب نہ آئیں۔
ویڈیو میں راہگیروں کو ملزم سے ہتھیار چھوڑنے کی درخواست کرتے سنا جا سکتا ہے۔ایک سینیئر پولیس اہلکار نے بتایا کہ ’شمالی 24 پرگنہ ضلع کے رہائشی امیت سرکار، ٹیکنیکل ایجوکیشن کے محکمے میں کام کرتے ہیں۔ آج صبح چھٹی لینے کی بات پر اپنے ساتھیوں کے ساتھ جھگڑے کے بعد انہوں نے ان پر چاقو سے حملہ کیا اور پھر فرار ہونے کی کوشش کی۔‘زخمی ساتھیوں کو علاج کے لیے قریبی ہسپتال منتقل کیا گیا جن میں سے دو کی حالت تشویشناک بتائی جاتی ہے۔پولیس کے مطابق جب امیت کمار سرکار کو چھٹی دینے سے انکار کیا گیا تو وہ بھڑک اُٹھے۔ تاہم، تاحال یہ معلوم نہیں ہو سکا کہ انہیں چھٹی کیوں نہیں دی گئی۔انڈیا ٹوڈے کے مطابق ذرائع نے بتایا کہ پولیس پوچھ گچھ کے دوران امیت کمار نے الزام لگایا کہ تلخ کلامی کے دوران ان کے ساتھیوں نے ان کے والد کے بارے میں ’نازیبا تبصرے‘ کیے تھے جس سے وہ مشتعل ہو گئے۔حکام نے بتایا کہ ملزم کو گرفتار کر لیا گیا ہے اور مزید تفتیش جاری ہے۔ پولیس کو شبہ ہے کہ ملزم کو دماغی صحت کے مسائل لاحق ہیں۔