معروف گلوکارہ نتاشا بیگ کا کہنا ہے کہ اگرچہ ان کا فوری طور پر شادی کرنے کا ارادہ نہیں، تاہم ان کی خواہش ہے کہ وہ کسی کوریا کے اداکار سے شادی کریں۔
نتاشا بیگ نے حال ہی میں نجی ٹی وی کے مزاحیہ پروگرام میں شرکت کی، جہاں انہوں نے مختلف معاملات پر کھل کر بات کی۔
پروگرام کے دوران انہوں نے بتایا کہ ان کا آبائی تعلق ہنزہ سے ہے اور وہاں کے لوگ بہت پیار کرنے اور عزت دینے والے ہیں۔
انہوں نے ’کوک اسٹوڈیو‘ میں گلوکاری کرنے کے تجربے کو یادگار قرار دیتے ہوئے کہا کہ وہ مذکورہ شو میں گلوکاری کرنے کی وجہ سے ہی مشہور ہوئیں۔
ان کے مطابق کوک اسٹوڈیو بہت بڑا پلیٹ فارم ہے جب کہ انہیں علامہ اقبال کا کلام پڑھنے کا موقع ملا، جسے وہ اپنی خوشقسمتی سمجھتی ہیں۔
ایک سوال کے جواب میں گلوکارہ نے بتایا کہ حالیہ دور میں ماضی جیسے اچھے ملی نغمے تیار نہیں ہو پا رہے۔
انہوں نے اعتراف کیا کہ ان سے بھی ماضی جیسا کوئی اچھا نغمہ تیار نہیں ہو پا رہا جب کہ باقی گلوکار بھی ماضی جیسے نغمے نہیں بنا پا رہے۔
انہوں نے دلیل دی کہ شاید اب ہر کوئی خود کو اپنے ملک میں مسائل میں گھرا ہوا محسوس کرتا ہے، جس وجہ سے ان کی حب الوطنی کم ہوچکی ہے، جس وجہ سے ان سے نغمے بھی نہیں بن پا رہے۔
ایک اور سوال کے جواب میں انہوں نے بتایا کہ وہ کورین زبان سیکھ رہی ہیں، کوریا کی زبان کے متعدد الفاظ اردو اور ان کی مادری زبان بروشسکی سے ملتے جلتے ہیں۔
انہوں نے بتایا کہ وہ کورین ڈراموں کی بڑی مداح ہیں، شروع میں بھی انہیں کوریا کے مرد اچھے نہیں لگتے تھے۔
نتاشا بیگ کا کہنا تھا کہ انہیں بھی لگتا تھا کہ کوریا کے لڑکے بھی لڑکیوں کی طرح ہیں لیکن اب انہیں پتا چل چکا ہے کہ وہاں کے مرد اچھے ہیں۔
انہوں نے بتایا کہ فی الحال ان کا شادی کا کوئی ارادہ نہیں، تاہم ان کی خواہش ہےکہ وہ کسی کوریا کے اداکار سے شادی کریں۔
انہوں نے واضح کیا کہ وہ کسی کوریائی عام مرد نہیں بلکہ اداکار سے ہی شادی کرنا پسند کریں گی اور ساتھ ہی انہوں نے اپنے پسندیدہ دو کورین اداکاروں کے نام بھی بتائے۔