خوبصورتی کا ٹائٹل جیتنے والی نوجوان امریکی لڑکی کار حادثے میں ہلاک ہو گئی۔
امریکی میڈیا کے مطابق 18 سالہ کیڈانس فریڈرکسن 17 فروری کو فلوریڈا میں کار حادثے میں ہلاک ہوئیں، وہ کم عمری میں مِس اوکالوسا کاؤنٹی ٹین یو ایس اے کا ٹائٹل جیتی تھیں۔
میڈیا رپورٹس کے مطابق کیڈانس فریڈرکسن ہائی وے پر خود گاڑی چلا رہی تھیں کہ اس دوران ان کی گاڑی ٹرالر سے ٹکرا گئی۔
پولیس کے مطابق کیڈانس فریڈرکسن کی موت جائے وقوع پر ہی ہو گئی تھی، حادثے کی مزید تحقیقات جاری ہیں۔
کیڈانس کی والدہ نے بتایا کہ یہ حادثہ ان کے گھر سے محض تین منٹ کی دوری پر پیش آیا۔ کیڈانس کی ناگہانی موت نے ان کے خاندان، دوستوں اور پورے علاقے کو سوگوار کردیا۔
کیڈینس فریڈرکسن نے 7 فروری کو اپنے انسٹاگرام پر بتایا تھا کہ انہیں ایلیسن میک کرینی انگرم فاؤنڈیشن کی طرف سے اسکالرشپ ملی ہے۔ انہوں نے یہ خوشی کا اعلان اپنی موت سے صرف ایک ہفتہ قبل کیا تھا۔
کیڈینس نے اپنے انسٹاگرام پر لکھا تھا، ’’یہ فراخدلانہ تعاون میرے مستقبل کو سنوارنے اور میرے خوابوں کو پورا کرنے میں مدد دے گا۔ انگرم فیملی، فاؤنڈیشن، اور اس میں شامل ہر شخص کا شکریہ!‘‘
خاندان کے افراد کے مطابق کیڈینس کو نو کالجوں سے آفر مل چکی تھی، اور وہ ویٹرنیرین بننے کا خواب دیکھ رہی تھیں۔
2017 میں جب کیڈینس کو لِٹل مِس نارتھ ویسٹ فلوریڈا کا تاج پہنایا گیا تھا تو انہوں نے ’’کیڈا پرومِس‘‘ نامی ایک چیریٹی پروگرام شروع کیا، جو فوسٹر کیئر، بے گھر اور تشدد کے پناہ گاہوں، اور اسپتالوں میں بچوں کو ٹیڈی بیئرز اور کمبل فراہم کرتا تھا۔
کیڈینس نے ’’کیڈا پرومِس‘ کے ذریعے چیریٹی کے کام کے علاوہ رونالڈ میک ڈونلڈ ہاؤس کےلیے 25 ہزار ڈالر بھی جمع کیے تھے۔