بھارتی اداکارہ اور آئٹم نمبر گرل راکھی ساونت کی پاکستانی اداکار دودی خان سے دبئی میں ملاقات کی ویڈیو نے سوشل میڈیا پر ہلچل مچادی ہے جس میں راکھی ساونت ہیرے کی انگوٹھی دکھا رہی ہیں۔
راکھی ساونت کی جانب سے شیئر کی گئی ویڈیو میں دودی خان نے انھیں ہیرے کی انگوٹھی دی ہے، جس کے بعد سوشل میڈیا پر دونوں کی منگنی کی افواہیں پھیل رہی ہیں۔
بھارتی اداکارہ راکھی ساونت، جو اپنی متنازعہ شہرت اور پیچیدہ محبت کی کہانیوں کےلیے مشہور ہیں، اب پاکستانی اداکار دودی خان کے ساتھ منگنی کی خبروں میں زیرِ بحث ہیں۔ دونوں کی ملاقات اور ان کے درمیان ہونے والی گفتگو نے مداحوں کو حیران کردیا ہے۔
سوشل میڈیا صارفین حیران ہیں کہ کیا راکھی ساونت، جو ماضی میں کئی ناکام تعلقات کا شکار رہی ہیں، اب دودی خان کے ساتھ اپنی زندگی کے نئے باب کا آغاز کرنے جارہی ہیں۔ وائرل ویڈیو میں دیکھا جاسکتا ہے کہ دودی خان نے راکھی کو ہیرے کی انگوٹھی دی، جس نے دونوں کے درمیان تعلقات کے بارے میں قیاس آرائیاں اور بڑھا دیں۔
راکھی ساونت کی زندگی میں کئی نامور لوگ آئے اور گئے، جن میں ابھیشیک اور رتیش جیسے نام شامل ہیں۔ انہوں نے عادل خان درانی سے شادی بھی کی، لیکن یہ رشتہ بھی جلد ہی تلخیوں کا شکار ہوگیا۔ اب راکھی کا نام پاکستانی اداکار دودی خان کے ساتھ منسلک ہوگیا ہے، جو ان کی زندگی میں ایک نئے موڑ کی نشاندہی کررہا ہے۔
دونوں کی سوشل میڈیا پر ہونے والی بات چیت نے اس تعلق کو مزید تقویت بخشی ہے۔ دودی خان نے ایک ویڈیو پیغام میں راکھی کو ہاتھ تھامنے کی پیشکش کی، جس پر راکھی نے بھارت سے ویڈیو پیغام میں ہی جواب دیا۔ تاہم، دودی خان کو سوشل میڈیا پر تنقید کا سامنا کرنا پڑا، جس کے بعد انہوں نے راکھی سے شادی نہ کرنے کا اعلان کردیا۔ انہوں نے یہ بھی کہا تھا کہ وہ راکھی کی شادی اپنے کسی دوست سے کروائیں گے، اور یہ کہ وہ پاکستان کی ہی بہو بنیں گی۔
حال ہی میں دودی خان اور راکھی ساونت کی ملاقات دبئی میں ہوئی، جس کی ویڈیوز سوشل میڈیا پر وائرل ہوگئیں۔ ان ویڈیوز میں راکھی نے دودی سے شکایت کا اظہار کیا اور کہا کہ انہوں نے وعدہ کرکے بیچ راستے میں چھوڑ دیا۔ دودی خان نے اس پر مختلف جواز پیش کیے۔
ایک اور وائرل ویڈیو میں دودی خان کو راکھی کو ڈائمنڈ رنگ پہناتے دیکھا گیا۔ راکھی نے انگوٹھی کے اصلی یا نقلی ہونے پر سوال اٹھایا، جس پر دودی خان نے کہا کہ یہ اصلی انگوٹھی ہے، جو ایک دوست کی جانب سے ایک دوست کےلیے ہے۔
یہ خبریں دونوں کے مداحوں کے لیے دلچسپی کا باعث بنی ہوئی ہیں، اور اب دیکھنا یہ ہے کہ راکھی ساونت اور دودی خان کی کہانی کس موڑ پر جا کر رکتی ہے۔