معروف سوشل میڈیا ایپ فیس بک نے صارفین کے لیے پیسے کمانے کا ایک اور طریقہ متعارف کروانے کا اعلان کر دیا ہے۔
کمپنی کی جانب سے ایک نیا فیچر متعارف کروایا گیا ہے جس کے ذریعے اب صارفین فیس بک اسٹوریز پر ملنے والے ویوز سے بھی پیسے کما سکیں گے۔
کمپنی نے یہ نیا آپشن عالمی سطح پر ان ڈیجیٹل کرئیٹرز کے لیے متعارف کروایا ہے جو فیس بک کانٹینٹ مونیٹائزیشن پروگرام کا حصّہ ہیں۔
یعنی صارفین اگر اپنی کسی بھی ویڈیو یا ریل کا کچھ حصّہ اپنی فیس بک اسٹوری کی صورت میں شیئر کرتے ہیں تو اس اسٹوری پر ملنے والے ویوز سے بھی پیسے کمائے جا سکیں گے۔
علاوہ ازیں صارفین عام زندگی کے بارے میں بھی اپنی فیس بک اسٹوری پر کچھ شیئر کرتے ہیں تو اس پر ملنے والے ویوز سے بھی پیسے کما سکیں گے۔
اس حوالے سے میٹا کے ترجمان کا کہنا ہے کہ فیس بک اسٹوریز کے ذریعے پیسے کمانے کا موقع صارفین کو مواد کی کارکردگی کی بنیاد پر ملے گا لیکن انہیں اس کے لیے ویوز کی کسی مخصوص حد کو حاصل کرنے کی ضرورت نہیں ہوگی۔
میٹا کے ترجمان نے مزید کہا کہ فیس بک کے اس نئے پروگرام کا مقصد صارفین کی حوصلہ افزائی کرنا ہے تاکہ وہ سوشل میڈیا پلیٹ فارم کے لیے زیادہ سے زیادہ مواد تیار کریں۔