سپریم کورٹ کے جسٹس منصور علی شاہ نے قائم مقام چیف جسٹس پاکستان کے عہدے کا حلف اٹھا لیا۔ حلف برداری کی تقریب سپریم کورٹ آف پاکستان کے ججز بلاک میں منعقد ہوئی، جس میں سپریم کورٹ کے سینئر جج جسٹس منیب اختر نے جسٹس منصور علی شاہ سے قائم مقام چیف جسٹس پاکستان کا حلف لیا۔
چیف جسٹس یحییٰ آفریدی دورہ چین پر موجود ہیں، چیف جسٹس یحییٰ آفریدی شنگھائی تعاون تنظیم (ایس سی او) عدالتی کانفرنس میں وفد کی قیادت کر رہے ہیں۔ سپریم کورٹ کے اعلامیہ کے مطابق ایس سی او عدالتی کانفرنس کل سے 26 اپریل تک چین کے شہر ہانگژو میں منعقد ہوگی۔
وفد میں جسٹس امین الدین، جسٹس شاہد وحید، ضلعی عدلیہ کے 2 ججز بھی شامل ہیں، ڈسٹرکٹ اینڈ سیشن جج گوادر ظفر جان، سینئر سول جج ضلع لکی مروت نادیہ گل وزیر وفد کا حصہ ہیں۔
چیف جسٹس آف پاکستان چین کے ساتھ تاریخی مفاہمتی یاد داشت پر دستخط کریں گے۔
چیف جسٹس آف پاکستان ایک خصوصی دعوت پر ترکی کا بھی دورہ کریں گے۔ چیف جسٹس یحییٰ آفریدی کی ایران اور ترکیہ کے ججز کے ساتھ دو طرفہ ملاقاتیں بھی شیڈول ہیں۔
چیف جسٹس ترکی کی آئینی عدالت کی 63 ویں سالگرہ کی تقریبات میں شرکت کریں گے۔