خالصتان تحریک کے رہنما گرپتونت سنگھ پنوں نے ایک بار پھر واضح کیا ہے کہ اگر بھارت نے پنجاب سے پاکستان پر حملہ کیا تو سکھ پاکستان کی پہلی دفاعی لائن ہوں گے، بھارتی فوج کے اندر موجود سکھ جانتے ہیں کہ ان کا اصل دشمن پاکستان نہیں بلکہ بھارتی سسٹم ہے۔
بھارتی سکھ رہنما گرپتونت سنگھ پنوں کا کہنا تھا کہ پاکستان انڈیا کی جنگ ہوگی یا نہیں اس بارے میں کچھ نہیں کہہ سکتا، فی الحال بھارت نے پاکستان پر حملہ نہیں کیا لیکن پاکستان کو ہرگز اطمینان سے نہیں بیٹھنا چاہیے۔
ان کا کہنا تھا اگر بھارت نے پنجاب سے پاکستان پر حملہ کیا تو سکھ پاکستان کی پہلی دفاعی لائن ہوں گے اور بھارتی ٹینکوں کا رخ موڑ دیں گے بشرطیکہ پاکستان حکومت اور فوج سکھوں اور پنجاب کا ساتھ دے اور اقوام متحدہ کے تحت خالصتان کے ریفرنڈم کو آگے بڑھائے۔
انہوں نے کہا کہ بھارتی فوج کے اندر موجود سکھ جانتے ہیں کہ ان کا اصل دشمن پاکستان نہیں بلکہ بھارتی سسٹم ہے اور وہ مودی کی جنگ نہیں بلکہ پنجاب کی آزادی کی جنگ لڑنا چاہتے ہیں، اگر کوئی سکھ فوجی کوشش بھی کرے گا پاکستان پر حملہ کرنے کی تو اسے ہار ہوگی۔
گرپتونت نے دعویٰ کیا کہ آزاد پنجاب یعنی خالصتان ہی پاکستان کے سیاسی اور معاشی مسائل کا حل ہے کیونکہ خالصتان بننے کے بعد پاکستان میں بھی ترقی کے دروازے کھلیں گے۔
انہوں نے بلوچستان میں بھارتی مداخلت کو ایک کھلی حقیقت قرار دیا اور کہا کہ اگر پاکستان چاہے تو حالیہ دہشتگرد حملے کو اقوام متحدہ میں لے جا سکتا ہے۔
ان کا مزید کہنا تھا کہ پاکستان آج صرف اپنی فوج کی بدولت قائم ہے، عموماً سیاستدان دونوں ممالک میں صرف کرسی بچانے میں مصروف رہتے ہیں تاہم پاکستان کے موجودہ وزیراعظم کو انہوں نے مخلص قرار دیا۔ جہاں تک مقبوضہ کشمیر کی بات ہے وہ اپنی آزادی کی لڑائی لڑ رہے ہیں۔
خالصتان تحریک کے رہنما کا کہنا تھا بلوچستان میں بھارتی مداخلت ہوتی ہے اس میں کوئی ڈھکی چھپی بات نہیں ہے یہ حقیقت ہے کہ پراکسیز کو فنڈنگ کر کے اسلحہ دیا جاتا ہے، ہندوستان کو غلط فہمی ہے کہ وہ نہیں ٹوٹے گا، پہلے پنجاب آزاد ہوگا پھر کشمیر ہوگا، روزانہ کی بنیاد پر 10، 15 کشمیری فریڈم فائٹر جاں بحق ہو جاتے ہیں اور ڈھائی ارب مسلمان موجود ہیں جن میں سے اکثریت کا ڈی این اے بدل کر بھارتی ہو چکا ہے، پاکستان کو چاہیے تھا کہ بلوچستان میں جو ابھی دہشت گردی کی گئی اس کی قرارداد اقوام متحدہ لے کر جاتا۔
ہندوستان الزام لگاتا ہے کہ پاکستان آپ کو سپورٹ کر رہا ہے، اس سوال کے جواب میں گرپتونت سنگھ پنوں نے کہا کہ اس طرح کے الزام لگتے رہتے ہیں ہم اس کا جواب نہیں دیتے لیکن یہ ہم جانتے ہیں ہمارا گروہ جانتا ہے کہ ہمارا کسی بھی سرکار کے ساتھ کوئی تعلق نہیں ہے چاہے وہ پاکستان کی ہو یا کوئی اور سرکار ہو کیونکہ ہم آزادی اپنے لیے چاہتے ہیں اپنے پنجاب کے لیے چاہتے ہیں۔
پہلگام واقعہ سے متعلق گرپتونت سنگھ کا کہنا تھا بھارتی سرکار مودی وزیراعظم ، امیت شاہ ، اجیت دوول ، راج ناتھ اور جے شنکر یہ وہ لوگ ہیں جنہوں نہ صرف بھارت میں دہشت گردی کی ہے بلکہ پوری دنیا میں دہشت گردی پھیلا رہے ہیں یہ حقیقت ہے کہ پہلگام وقعہ میں ہندوؤں کی قتل و غارت ہوئی ہے لیکن اس کے پیچھے بھارتی سرکار ہے، اب دیکھنا یہ ہے کہ اس واقعہ سے فائدہ کس کو ہو سکتا تھا جبکہ پاکستان کو اس سے نقصان ہوا اور مودی کو فائدہ ہونا تھا کیوں کہ امریکی وفد بھی وہاں موجود تھا اس لیے کئی فائدے مودی سرکار نے اٹھانے کی کوشش کی اس سے کشمیری فریڈم فائٹر پر الزام لگا اور اس سب سے مودی کو فائدہ ہونا تھا لیکن حقیقت یہ ہے کہ بھارت کا چہرہ بے نقاب ہوچکا ہے۔
انہوں نے کہا کہ کینیڈا، امریکا میں مودی ٹولے کی تحقیقات ہو رہی ہیں، میں نے خالصتان تحریک سے متعلق سکھ فار جسٹس کے رہنما سے کہا کہ ہم قلم کی طاقت سے لڑائی لڑ رہے ہیں اور وہاں 600 سے زیادہ سکھوں کے خلاف غداری کے کیس ہو چکے ہیں اور وہ بغیر مقدمہ چلائے بند ہیں۔
گرپتونت سنگھ پنوں نے پروگرام کے اختتام پر ʼʼپاکستان زندہ بادʼʼ اور ʼʼخالصتان زندہ بادʼʼ کے نعرے بھی لگائے اور بھارت کی سکھ دشمن پالیسیوں را کی بین الاقوامی سازشوں اور مودی حکومت کے خلاف امریکہ و کینیڈا میں جاری تحقیقات کا بھی ذکر کیا۔