پاکستان میں وفاقی حکومت نے عیدا لاضحیٰ کے موقع پر سرکاری چھٹیوں کا اعلان کر دیا ہے۔
پیر کو کیبنٹ ڈویژن کی جانب سے جاری کیے گئے نوٹیفکیشن کے مطابق ملک بھر میں عید الاضحٰی پر چار تعطیلات ہوں گی۔نوٹیفکیشن میں کہا گیا ہے کہ سال 2025 کے دوران سرکاری چھٹیوں کے حوالے سے جاری کردہ سرکلر کے مطابق وزیراعظم کی ہدایت پر عیدالاضحٰی کی چھٹیوں کا اعلان کیا جا رہا ہے۔حکومت نے عیدالاضحٰی پر چار تعطیلات کا اعلان کیا ہے جو جمعہ چھ جون سے پیر 9 جون تک ہوں گی۔نوٹیفکیشن کے مطابق چار سرکاری تعطیلات ہفتے میں پانچ دن اور ہفتے میں چھ دن کام کرنے والے تمام دفاتر کے لیے ہیں۔پاکستان میں عیدالاضحٰی سنیچر سات جون کو منائی جائے گی۔اسلامی کیلنڈر کے مطابق عیدالاضحٰی دس ذی الحجہ کو منائی جاتی ہے جب دنیا بھر میں استطاعت رکھنے والے مسلمان سنت ابراہیمی کے تحت جانور ذبح کرتے ہیں۔