کراچی میں بارش کے دوران پیش آنے والا ایک المناک سانحہ دو نوجوان بھائیوں کی جان لے گیا۔ ناتھا خان گوٹھ کے علاقے میں کرنٹ لگنے سے جاں بحق ہونے والے مراد اور سراج کی تدفین کر دی گئی ہے، جبکہ پولیس نے واقعے کا مقدمہ کے الیکٹرک کے اعلیٰ افسران کے خلاف درج کر لیا ہے۔
پولیس کے مطابق 21 سالہ مراد اور 16 سالہ سراج منگل کے روز حادثے کا شکار ہوئے۔ مدعی والد سلطان نے بتایا کہ چھوٹا بیٹا سراج دکان سے سامان لینے گیا تو کھمبے سے بجلی کا جھٹکا لگا۔ اطلاع ملنے پر بڑا بیٹا مراد بھائی کو بچانے پہنچا لیکن وہ بھی کرنٹ کی لپیٹ میں آ گیا۔ سراج موقع پر ہی دم توڑ گیا جبکہ مراد ٹریفک جام کے باعث بروقت اسپتال نہ پہنچ سکا اور راستے میں جاں بحق ہو گیا۔
شاہ فیصل کالونی تھانے میں درج مقدمے میں قتلِ خطا کی دفعات شامل کی گئی ہیں۔ واقعے پر علاقے میں شدید رنج و غم پایا جاتا ہے اور شہریوں نے کے الیکٹرک کی غفلت کو اس المیے کا ذمہ دار قرار دیا ہے۔
دونوں بھائیوں کی نماز جنازہ میں جماعت اسلامی کراچی کے امیر منعم ظفر سمیت بڑی تعداد میں لوگ شریک ہوئے اور سوگوار گھرانے سے اظہارِ تعزیت کیا۔
یاد رہے کہ شہر میں حالیہ بارشوں کے بعد مختلف حادثات میں اب تک 17 قیمتی جانیں ضائع ہو چکی ہیں، جن میں سے بیشتر واقعات بجلی کے کھمبوں اور تاروں سے کرنٹ لگنے کے باعث پیش آئے۔ یہ صورتحال ایک بار پھر کراچی میں بنیادی ڈھانچے اور حفاظتی انتظامات پر سنگین سوالات اٹھا رہی ہے۔