ملک میں جنگلات کی کٹائی کے بڑھتے ہوئے رحجان پر وفاقی حکومت نے نوٹس لیتے ہوئے تمام صوبوں اور علاقوں سے گزشتہ پانچ سالوں کا تفصیلی ڈیٹا طلب کر لیا ہے۔
خصوصی سرمایہ کاری کوآرڈینیشن کونسل ایس آئی ایف سی نے پنجاب، سندھ، بلوچستان، خیبرپختونخوا، گلگت بلتستان اور آزاد کشمیر کو ہدایت جاری کی ہے کہ وہ جنگلات کی کٹائی کے واقعات، رقبے میں کمی اور جنگلی حیات کی پناہ گاہوں کی تباہی سے متعلق ڈیٹا فراہم کریں۔
ایس آئی ایف سی کا کہنا ہے کہ یہ معلومات اعلیٰ حکومتی سطح پر نظرثانی اور مستقبل کی حکمت عملی کے تعین میں معاون ثابت ہوں گی اور اس سلسلے میں وفاقی وزارت ماحولیاتی تبدیلی نے بھی صوبوں کو مراسلہ بھیج دیا ہے۔
واضح رہے کہ ملک بھر میں اور بالخصوص خیبرپختونخوا میں درختوں کی بے دریغ کٹائی کے باعث موسمیاتی توازن بری طرح متاثر ہوا ہے جس کی وجہ سے حالیہ برسوں میں قدرتی آفات اور ماحولیاتی تبدیلیوں نے تباہ کن اثرات مرتب کیے ہیں۔
ماہرین کا کہنا ہے کہ جنگلات کاٹنے سے موسمی تغیرات کے خطرات میں اضافہ ہوا ہے۔