گیارہ جہازوں پر مشتمل ایک اور امدادی فلوٹیلا غزہ کی جانب گامزن

گلوبل صمود فلوٹیلا پر اسرائیلی قبضے کے بعد 11 مزید جہاز اسرائیلی ناکہ بندی کو چیلنج کرنے کے لیے غزہ کی جانب روانہ ہوگئے ہیں۔

بین الاقوامی تنظیم فریڈم فلوٹیلا کولیشن (ایف ایف سی) نے کہا ہے کہ امدادی فلوٹیلا میں شامل 2 کشتیاں اٹلی کے شہر اوترانتو سے 25 ستمبر کو روانہ ہوئیں، 30 ستمبر کو ’کونشین‘ نامی جہاز بھی ان کے ساتھ شامل ہوگیا، اس جہاز پر صحافی اور طبی عملہ موجود ہے۔

بیان میں کہا گیا ہے کہ یہ جہاز چند گھنٹوں میں 8 کشتیوں پر مشتمل ایک قافلے ’تھاؤزنڈ میڈلینز ٹو غزہ‘ سے مل جائیں گے اور مجموعی طور پر 11 جہازوں پر مشتمل قافلہ غزہ کا رخ کرے گا۔

فریڈم فلوٹیلا کولیشن کے مطابق فلوٹیلا اس وقت کِریٹ کے ساحل کے قریب موجود ہے اور اس پر تقریباً 100 افراد سوار ہیں۔ یہ نیا قافلہ ایسے دن روانہ ہورہا جب اسرائیلی بحریہ نے غزہ جانے والی 40 سے زائد کشتیوں پر مشتمل ’گلوبل صمود فلوٹیلا‘ کی آخری کشتی پر بھی حملہ کرکے اسے قبضے میں لے لیا تھا، اسرائیلی فوج نے فلوٹیلا پر سوار 450 سے زائد کارکنوں کو گرفتار کرلیا ہے۔

یاد رہے کہ اسرائیل نے 18 برس سے غزہ پر ناکہ بندی مسلط کر رکھی ہے اور مارچ میں سرحدی راستے بند کرکے خوراک، ادویہ کی ترسیل روک کر محاصرے کو مزید سخت کردیا ہے۔

واضح رہے کہ اکتوبر 2023 سے جاری اسرائیلی جارحیت میں اب تک 66 ہزار 200 سے زائد فلسطینی شہید ہوچکے ہیں جن میں خواتین اور بچوں کی اکثریت شامل ہے۔