برطانوی جریدے دی اکانومسٹ نے سابق وزیراعظم عمران خان کی اہلیہ بشریٰ بی بی کے کردار پر خصوصی رپورٹ شائع کی ہے جس میں دعویٰ کیا گیا ہے کہ عمران خان کی تیسری شادی نے نہ صرف ان کی نجی زندگی بلکہ ان کے حکومتی طرزِ عمل اور فیصلہ سازی پر بھی سوالات کھڑے کیے۔
رپورٹ کے مطابق سینئر صحافی اوون بینیٹ جونز نے لکھا کہ سابق وزیراعظم کے قریبی حلقوں کا کہنا ہے کہ بشریٰ بی بی اہم سرکاری تقرریوں اور روزمرہ حکومتی فیصلوں پر اثر انداز ہونے کی کوشش کرتی تھیں جس کے باعث عمران خان کے فیصلوں پر "روحانی مشاورت" کا پہلو نمایاں ہوتا گیا۔
دی اکانومسٹ نے مزید لکھا ہے کہ بشریٰ بی بی کے مبینہ روحانی اثرات کی وجہ سے عمران خان اپنے اعلان کردہ اصلاحاتی ایجنڈے کو عملی شکل دینے میں ناکام رہے۔
رپورٹ کے مطابق بعض مبصرین کا دعویٰ ہے کہ حساس اداروں کے کچھ افراد ایسی معلومات بشریٰ بی بی تک پہنچاتے تھے جنہیں وہ عمران خان کے سامنے اپنی روحانی بصیرت سے حاصل کردہ معلومات کے طور پر پیش کرتی تھیں۔
جریدے کی رپورٹ میں کہا گیا ہے کہ بشریٰ بی بی کے مبینہ اثر و رسوخ نے عمران خان کی فیصلہ سازی کو متاثر کیا اور ان کے دورِ حکومت میں غیر معمولی روحانی اثرات اور مشاورت کے مبینہ کردار پر مسلسل سوالات اٹھتے رہے۔