اڈیالہ جیل میں قید بانی پی ٹی آئی کی صحت سے متعلق سوشل میڈیا اور بھارتی میڈیا پر پھیلنے والی افواہوں پر سپرنٹنڈنٹ اڈیالہ جیل کا دلچسپ اور دو ٹوک ردعمل سامنے آگیا۔
سپرنٹنڈنٹ اڈیالہ جیل نے کہا کہ ”جیل انتظامیہ کو اطلاع کرنے پر انڈین میڈیا کا شکر گزار ہوں، مجھے بھی صحافی بھائیوں کی کالز آرہی ہیں اور وہ پوچھ رہے ہیں کہ کیا کوئی ایسی بات ہے۔ میں چیک کرلیتا ہوں، ان کے منہ میں خاک“۔
انہوں نے مزید کہا کہ قیدی کی صحت سے متعلق تمام افواہیں بے بنیاد ہیں۔ ”میں ان کی مزید صحت یابی کے لیے دعا گو ہوں، اپنی پوری ذمہ داری سے کہہ رہا ہوں کہ الحمدللہ وہ مکمل طور پر صحت یاب ہیں“۔
سپرنٹنڈنٹ نے واضح کیا کہ جیل خانہ جات پنجاب ملکی میڈیا کے نمائندگان کو جواب دہ ہے اور تمام معلومات شفاف طریقے سے فراہم کی جاتی ہیں۔
”ابھی تھوڑی دیر میں آفیشل پریس ریلیز بھی جاری کر دی جائے گی“۔