غریب عوام کی کمر توڑنے کے لئے ایک اب سردی میں سوئی گیس کی قیمتوں میں ہوشربا اضافہ کردیا گیا ہے۔ ویسے تو سوئی گیس سردیوں میں نایاب ہوجاتی ہے اور صرف کچھ دیر کو میسر آتی ہے لیکن اب وفاقی حکومت کی جانب سے اس کی قیمتیں بھی بڑھا دی گئی ہیں۔
پٹرولیم ڈویژن کے جاری کردہ اعلامیہ کے مطابق گیس کی نئی قیمتوں کا اطلاق یکم نومبر سے ہوگا البتہ ماہانہ25سے90مکعب میٹر تک گیس کے پروٹیکٹڈ صارفین کیلئے قیمت نہیں بڑھائی گئی۔
جبکہ پروٹیکٹڈ صارفین کے لیے فکس چارجز10سے بڑھا کر400روپے بڑھا دیے گئے ہیں اور نان پروٹیکٹڈ گھریلو صارفین کیلئے گیس نرخ میں 172 فیصد سے زائد اضافہ کیا گیا ہے۔ پٹرولیم ڈویژن کے اعلامیہ کے مطابق ماہانہ25مکعب میٹر صارفین کیلئے قیمت200سے بڑھا کر300روپے فی ایم ایم بی ٹی یو مقرر کردی گئی۔ اس کے علاوہ ماہانہ60مکعب میٹر استعمال پر گیس قیمت300سے بڑھ کر 600روپے فی ایم ایم بی ٹی یو مقرر کی گئی ہے، ماہانہ100 مکعب میٹر استعمال پر گیس کی قیمت400سے بڑھا کر 1000روپے فی ایم ایم بی ٹی یو مقرر کی گئی ہے۔