بلیوں کی اچھل کود اکثر دیکھنے والوں کا دل موہ لیتی ہے اور لوگ بہت شوق سے بلیاں پالتے بھی ہیں لیکن کئی بار یہ بلیاں ایسی حرکت کرجاتی ہیں کہ ان کی اپنی جان پر بن آتی ہے، کینیڈا میں ایک ایسا ہی واقعہ پیش آیا جب ایک بلی نے اپنی جان مشکل میں ڈال دی۔
کینیڈا کے صوبے نیو فاؤنڈ لینڈ میں ایک بلی کسی طرح بجلی کے پول کے بالکل اوپر چڑھ گئی اور کافی دیر تک کوشش کے باوجود وہاں سے اتر نہیں پائی جس کی وجہ سے لوگوں نے امدادی ادارے کو فون کیا اور ایک ریسکیو ٹیم بلی کی مدد کے لیے وہاں پہنچ گئی۔
مقامی لوگوں نے بتایا کہ بلی کو محلے کے کتوں نے تنگ کیا جس کی وجہ سے وہ کھمبے پر چڑھ گئی تھی اور دو گھنٹے تک اوپر سے مدد کے لیے میاؤں میاؤں کرتی رہی۔
بجلی کے کھمبے کے اوپر پھنسی بلی کو بچانے کے لیے جب ریسکیو ورکر اس کے قریب آیا تو اس نے نہایت حیرت انگیز حرکت کی جس کی ویڈیو وائرل ہوگئی۔
صورتحال اس وقت خراب ہوگئی جب ریسکیو ورکر کھمبے کے اوپر بلی کے قریب پہنچا تو بلی نے زمین کی طرف چھلانگ لگا دی جو کی ویڈیو کیمرے میں ریکارڈ ہوگئی۔
ریسکیو کارکن بچانے کے لیے کھمبے پر چڑھ کر جیسے ہی قریب پہنچا بلی نے آؤ دیکھا نہ تاؤ اور اونچائی سے زمین پر چھلانگ لگادی۔ ریسکیو اہلکار کا کہنا ہے کہ کبھی نہیں سوچا تھا کہ وہ بلی کودنے والی ہے اور حیرت کی بات یہ ہے کہ بلی نے زمین پر اترنے کے بعد دوڑنا شروع کر دیا۔