اچھرہ واقعے سے مشہور ہونے والی شہربانو نقوی کو وزیر اعلیٰ پنجاب مریم نواز نے بھی گلے لگا لیا جس کی ویڈیو اس وقت سوشل میڈیا پر گردش کررہی ہے۔ دیکھیں۔
ویڈیو میں دیکھا جاسکتا ہے کہ سپرنٹنڈنٹ آف پولیس (اے ایس پی) شہربانو نقوی کو وزیر اعلیٰ پنجاب مریم نواز گلے لگا کر تھپکی دے رہی ہیں۔ اس کے علاوہ مریم نواز نے اے ایس پی شہربانو کو بہادر افسر بھی قرار دیا اور ساتھ ہی یہ بھی کہا کہ انہوں نے نئے پولیس افسران کے لیے مثال قائم کردی۔
چند دن پہلے اداکارہ جگن کاظم نے بھی ایس پی شہر بانو کے ہاتھ احتراماً چومے تھے جس کی تصاویر پر سوشل میڈیا صارفین نے شدید تنقید کی تھی۔ صارفین کا کہنا ہے کہ ایس پی صاحبہ نے بے شک قابل تعریف کام کیا ہے لیکن ان کو اس حد تک سراہنا اور ان کی شادی کی تصاویر وائرل کرنا بے جا ہے۔
اس ہی واقعے میں ایک اور ہیرو بھی سامنے آیا جس کے بارے میں بہت کم لوگ جانتے ہیں۔ جانسن طارق نامی دکاندار نے اچھرہ واقعے میں متاثرہ خاتون کو اپنے فوڈ پوائنٹ میں پناہ دی البتہ نہ تو ان کو قومی سطح پر سراہا گیا نہ ہی سوشل میڈیا پر ہی ان کے بارے میں زیادہ گفتگو ہوئی۔ جبکہ جانسن نے اپنی جان اور دکان کی پرواہ نہ کرتے ہوئے نہ صرف متاثرہ خاتون کو دکان میں پناہ دی بلکہ ان کی حفاظت کے لئے دکان کو تالا بھی لگا دیا۔ جس کے بعد پولیس کی نفری جائے وقوعہ پر پہنچی۔