Mere Hone Ke Hain Nishaan Mujh

Mere Hone Ke Hain Nishaan Mujh Me
Main Hi Main Hoon, Tu Hai Kahaan Mujh Me

Simt Ka Merii Tu Ta'ayyun Hai
Saikdon Hain Qutub Numa Mujh Me

Main Bazaahir Akailaa Lagta Hoon
Mere Jaison Ka Kaarwaan Mujh Me

Raaste Ab Mujhe Nahi Milte
Hausle Hain Dhu'aan Dhu'aan Mujh Me

Ik Parii Koh-E-Qaaf Se Aayee
Hai Paristaan Chupaa Kahaan Mujh Me

Aaj Ik Ajnabii Nikal Bhaagaa
Kaun Barson Se Tha Chupa Mujh Me

Main Har Aik Zaavye Se Tujh Ko Sochoon
Aks Teraa Hii Ho Ayaan Mujh Me

Mujh Ko Hai Ilm Apni Manzil Ka
Hai Sitaaron Ka Ik Jahaan Mujh Me

Mujh Me Panchii Qayaam Karte Hain
Hai Haseen Unkaa Aashiyaan Mujh Me

Khauf 'Parvez' Hai Fuzool Teraa
Khone Ko Ab Rahaa Kyaa Mujh Me